Janë prishur ditët e qeta të rendit, të cilat shoqëruan kalimin e drejtimit të Policisë së Shtetit nga Ardi Veliu te Gledis Nano, ky i fundit parë si një shpresë për vënien në shina të punës së policisë përballë krimit.
Mbrëmjen e së shtunës, në Fier u ekzekutua një biznesmen, tipikisht në mënyrë mafioze. Demir Backa u qëllua me breshëri, nga autorë që më pas dogjën automjetin së bashku me armët e krimit brenda.
Orë më vonë, në mesnatë, një ngjarje e rëndë është regjistruar në Nikël të Krujës (foto kryesore), ku persona edhe me veshje policore, kanë keqtrajtuar mizorisht një bizesmen në banesën e tij, duke i rrëmbyer bizhuteri e para në vlerë 100 mijë euro. Fjala është për Nazmi Çangën, të cilit i kanë prerë dhe gishtat.
Janë këto dy ngjarje të rënda të cilat përbëjnë provën e parë për ish-kreun e antiterrorit shqiptar, se sa rol do ketë në zbardhjen sa më shpejtë të rasteve, shoqëruar me zbardhjen dhe kapjen e autorëve, për të treguar kështu se dhe për krimin kanë ardhur ditë të zeza. /tesheshi.com/
