Dy turistë çekë janë vrarë dhe më pas janë hedhur në greminë bashkë me mjetin e tyre në zonën e Dukagjinit. Fillimisht u fol për një aksident të tyre, por burime të policisë dhe Prokurorisë së Shkodrës tregojnë se, persona ende të paidentifikuar i kanë vrarë dy turistët që ishin nisur drejt zonës së Thethit. Dyshohet se turistët janë ekzekutuar pas një tentative grabitje.
Ata janë qëlluar me kallashnikov dhe më pas janë hedhur në një greminë rreth 15 metra bashkë me mjetin e tyre “Nisan”. Burimet e policisë që kanë shkuar në vendin e ngjarjes, thonë se vrasja ka ndodhur rreth orës 20:30, kur sapo ka nisur të errësohej.
Mësohet se autorët e ngjarjes i janë afruar automjetit për të marrë sendet e viktimave, por kanë lënë gjurmët e gishterinjëve në xhamin e pasagjerit.
Tereni i vështirë dhe mungesa edhe e valëve të telefonit ka bërë që të ketë pak informacion për këtë ngjarje të rëndë. Policia është duke hetuar, por kjo nuk është ngjarja e parë e rëndë që ndodh me turistët çekë në vendin tonë. Tre të rinj u zhdukën në vitin 2001 po në këtë zonë dhe sot e kësaj dite nuk është mësuar ende asgjë për fatin e tyre. Tre turistë po çekë u grabitën në vitin 2012 në Kukës, ndërsa në maj të këtij viti, po një turist çek humbi jetën duke bërë rafting në lumin e Kirit në Shkodër.
