Kreu i partisë çame, PDIU, Shpëtim Idrizi replikon me përgjigjen e kryediplomatit grek, Nikos Kotzias në konferencën e përbashkët për shtyp me homologun shqiptar në Tiranë lidhur me kthimin e pronave të çamëve.
Pala greke duket se vijon të ruajë të njëjtin qëndrim sa u përket pronave të shqiptarëve të Çamërisë të dëbuar pas Luftës së Dytë Botërore. “Qëndrimi i tij ndaj çështjes çame, duke kërkuar edhe një herë ‘fajtorët’ te viktimat është një qëndrim folklorik, tipik i provincializmit ballkanik dhe në kontrast të dukshëm nga qëndrimi fisnik e me vlera europiane që mbajti një ditë më parë Presidenti i Parlamentit Europian, Martin Shultz, i cili kërkoi falje për masakrat e nazizmit”, shkruan Idrizi në Facebook.
Ndërsa lidhur me ligjin e luftës që, sipas tij, ekziston mes dy vendeve, ai tha se ai mbretëron edhe si mendësi në qeverinë e re greke, që me sa duket ka humbur çdo lidhje me antifashizmin nga buron dhe ka kaluar në përqafimin e ideve të papranueshme për Europën. /tesheshi/
