Komisioni Qendror i Zgjedhjeve me vota unanime u ka hequr mandatin dy deputetëve: Shkëlqim Selami dhe Dashamir Tahiri, si dhe kryetarit të bashkisë Kavajë, Elvis Roshit.
KQZ ka vendosur që të shpallë të pavlefshëm mandatet e të tre funksionarëve politikë.
Menjëherë pas këtij vendimi, kur nuk ka zgjatur as 10 minuta ka reaguar edhe ambasada e SHBA që ka përshëndetur, si një mesazh i qartë që politika duhet të pastrohet nga të inkriminuarit, pa asnje lloj kompromisi….
Ambasada e Shteteve të Bashkuara mirëpret vendimin e Komisionit Qendror të Zgjedhjeve dhe kërkesën e Prokurorit të Përgjithshëm për të hequr mandatet e tre politikanëve, Elvis Rroshit, Shkëlqim Selamit, dhe Dashamir Tahirit, nën ligjin e dekriminalizimit. Vendimi i sotëm është një fitore për popullin shqiptar dhe një paralajmërim për kriminelët që po mendojnë a të jenë kandidatë në zgjedhjet parlamentare të 18 qershorit. Zyrtarët e zgjedhur apo të emëruar që plotësojnë deklarata false duhet të ndëshkohen me gjithë forcën e ligjit. Personat me dosje penale nuk mund të kenë vend në përfaqësimin e shqiptarëve”, thuhet në deklaratën për shtyp të ambasadës amerikane.
Ndërkaq, edhe ministri i Drejtësisë Ylli Manjani ka bërë thirrje për t’u respektuar vendimi.
Më herët në KQZ ka pasur debat lidhur me materialet e ardhura të Prokurorisë.
Sipas kreut të komisionit, Denar Biba, prokuroria ka dërguar materialin me saktësime siç i është kërkuar për të vijuar mbledhjen, por avokati i Dashamir Tahirit, Fatmir Braka ka kundërshtuar duke thënë se prokuroria ka dërguar të njëjtin material.
“Materiali nuk është i ri. Pak kanë ndryshuar, janë thjesht disa saktësime siç i kërkuam. Komisioni ishte në dilemë nëse do ishim në pozitën e noterit apo gjykatë. Ne donim një proces të rregullt ligjor”, u shpreh kreu i KQZ, Denar Biba.
“Prokurori ka dërguar të njëjtin material dhe sërish është gabim, ka ngatërruar datën e klientit tim. Në 2009 është dënuar në Ravena por këtu flitet për një vendim gjyqësor. Prokuroria se ka. Si ka hyrë kësaj gjëje. Informacioni është marrë në mënyrë narrative nga Europol, jo nga drejtësia. Informacioni është i gabuar. Ne jua vumë në dispozicion vendimin”, ka thënë avokati Braka. /tesheshi.com/
