Sot, nga ora 07:00 deri në ora 19:00, qytetarët e Kosovës me të drejtë vote do të kenë mundësi për të votuar për të zgjedhur 120 deputetët e Kuvendit.
Këtë proces zgjedhor, që udhëhiqet nga Komisioni Qendror i Zgjedhjeve (KQZ), do ta vëzhgojnë rreth 30 mijë vëzhgues nga organizata vendore e ndërkombëtare, media vendore e ndërkombëtare, dhe nga përfaqësues të trupave zgjedhore nga vendet e tjera.
Në gjithë Kosovën do të hapen 889 qendra votimi me gjithsej 2490 vendvotime, derisa numri i votuesve është 1 milion e 872 mijë e 941 votues.
Për mbarëvajtjen e procesit zgjedhor do të kujdesen policia dhe Prokuroria e shtetit, institucione këto me të cilat KQZ-ja ka nënshkruar edhe memorandum bashkëpunimi.
KQZ ka certifikuar 26 subjekte politike për pjesëmarrje për zgjedhjet e parakohshme, 5 koalicione, 19 parti politike dhe 2 nisma qytetare.
Numri i përgjithshëm i kandidatëve të certifikuar është 971 kandidatë për 120 vende për deputetë.
KQZ ka bërë të ditur se rezultatet preliminare të zgjedhjeve, nuk do të vonohen, meqë është vetëm një fletëvotim, dhe se numërimi do të jetë më i shpejtë. /tesheshi.com/
