Nga Blendi Gashi
Ngjarjet e ditëve të fundit, si dënimi me burg i aktivistëve të Vetëvendosje-s, më pas arrestimi i deputetëve të saj, dalja e PDK-së kundër EULEX-it, deklarimet për mospranim të rezultatit zgjedhor nga partit të caktuara, mosmbajtja e seancave plenare…të gjitha janë një sinjal i qartë se Kosova ka hyrë në një qorrsokak të ri dhe se nuk ka tejkaluar krizën e dy viteve të fundit.
Dhe siç duket ky tension do të vazhdojë, ndërsa nuk ju jepet një zgjidhje Demarkacionit e Asociacionit, ndërkohë Gjykata Speciale ka paralajmëruar se do kapë jo pak figura të njohura politike.
Duke parë tensionet mes partive, njohësit e rrethanave politike nuk përjashtojnë mundësinë që Kosova të futet në një krizë të thellë, ku sipas tyre pasojat mund të jenë të mëdha, ndërsa ngjarjet e fundit i lidhin jo vetëm me rezultatet zgjedhore por edhe temat e mëdha që mbeten të papërfunduara.
Analisti politik Albinot Maloku shprehet se konstelacionet politike në Kosovë ka kohë që janë mjaftë fragjile dhe kjo situatë po vazhdon të jetë e pandryshueshme, nga e cila më së shumti po e pëson qytetari.
“Lidhjet që po ju bëhen proceseve, nga të gjitha garnitura politike pa dallim, po ka një ndikim gati në çdo tentativë të ndryshimit aq të nevojshëm për Kosovën. Kjo ndërlidhje nuk do të ketë jetë aq të shkurtër edhe pse është bërë rënduese për Kosovën. Siç dihet, Kosova ende nuk i përmbylli çështjet si Asociacioni i Komunave me shumicën serbe, Demarkacioni, transformimi i FSK-së në Forca të Armatosura dhe për të gjitha këto nuk ka një vi unifikuese e spektrit politik se si të zgjidhen”, thotë Maloku për tesheshi.com.
Tensionet e fundit ai i lidh edhe me rezultatet e zgjedhjeve lokale.
“Kryeministri Ramush Haradinaj brenda koalicionit aktual PAN plus AKR, pas zgjedhjeve lokale nuk është më siç ka qenë. Partia e tij me marrjen e Istogut, i jep primatin e liderit brenda koalicionit aktual qeverisës dhe një fuqi krejt tjetër, nga që e kishte. Në anën tjetër PDK është në sikletin më të madh dhe qasja e deklaratat e tyre ndaj EULEX-it, që pa dyshim është mision i dështuar, nuk tingëllojnë edhe aq të sinqerta. Në procesin zgjedhor doli si doli dhe që të gjitha e kanë qitur PDK-në në një situatë shumë stresuese dhe që mund të prodhojë efekte edhe më të dëmshme”, thotë Maloku.
Arsim Haziri, njohës i rrethanave politike thotë se prej zgjedhjeve lokale, vendin e kanë përcjellë shumë zhvillime politike pa bazë të mjaftueshme, vetëm që vendi të orientohet drejt një krize sociale dhe institucionale.
“Këtë krizë sicio-politike konsideroj se është duke e shkaktuar qeverisja aktuale e prirë në masë të madhe prej PDK-së, vetëm që kryeministrin aktual ta paraqes me një imazh negativ, dhe në mënyrë që të krijojë kushte për fuqizimin e subjektit të tyre. Mirë e dimë se posti i kryeministrit jo edhe me lehtësi i është dhënë AAK dhe kjo ka ardhur për të eleminuar largimin e PDK-së prej pushtetit dhe në momentin që Veseli konstaton se subjekti i tyre shënon rritje ajo prodhon gjitha kushtet që vendi në vitin e ardhshëm të shkoj në zgjedhje të parakohshme nacionale. Këto zhvillime negative mendoi se është duke i shkaktuar qeverisja por me pjesëmarrje më të madhe prej PDK-së në mënyrë që të prezentoj ekzekutivin Haradinaj të paaftë karshi proceseve si dhe përmes ndikimit politik të mundohet që Vetëvendosje-n ta minimizoj në kohën kur kjo ka shënuar rritje drastike. Pra kjo situatë i përshtatet PDK-së dhe krizën mundohet ta shfrytëzoj për poena politik”, thotë Haziri për tesheshi.com.
Kurse njohësi i rrethanave politike Leon Duhanaj, kritikon veprimet e Lëvizjes Vetëvendosje pasi thotë se nuk po i respekton organet e drejtësisë, ndërsa e sheh Specialen si një prej arsyeve pse mund të përkeqësohet situata politike.
“Ne si shoqëri, nuk kemi pse t’i frikësohemi drejtësisë. Nëse dikush individualisht ka frikë të bazuar, atëherë duhët të përballet me faktet, e jo të ndikojë në njollosjen e UÇK-së dhe të gjithë shqiptarëve”, thotë Duhanaj për tesheshi.com.
Kurse lidhur me akuzat e PDK-së ndaj EULEX-it, Duhanaj thotë se ky mison ka bërë gabime dhe se përgjegjësia për dështimin e tij bie mbi ndërkombëtarët.
“Qeveria Haradinaj, përmes një rezolute në Kuvend, do duhej t’i kërkohej BE-së që përgjegjësia për dështimet në drejtësi, të ndahet proporcionalisht, e mos të shantazhohet popullata e Kosovës për dështimet e politikës”, thotë Duhanaj.
Ndërsa Jusuf Thaçi, poashtu njohës i zhvillimeve politike, konsideron se dikush është duke provokuar trazira në Kosovë dhe këtë mendim e mbështet në zhvillimet e fundit.
“Kosova as nuk ka nevojë e as nuk mund t’i mbijetojë një krize të brendshme e trazirave të brendshme, të cilat mund t’i ndihmojnë vetëm atyre që për hir të interesave personale e klanore, si dhe për hir të shpëtimit të prapanicës së vet janë në gjendje ta destabilizojnë e ta kallin Kosovën. Prandaj, do të ishte mirë që të gjithë të provokuarit të tregohen të menqur e të matur, në mënyrë që mos t’ia plotësojnë dëshirën atyre që duan të shkaktojnë trazira në Kosovë”, ka shkruar Thaçi në Facebook.
Sipas tij drejtësia mund të ketë kohë për t’u rivendosur, ndërsa pasojat e trazirave nuk mund të riparohen kurrë. /tesheshi.com/
