Nga Blendi Gashi
Presidenti Thaçi, me idenë për korrigjim të kufirit me Serbinë e ka futur opozitën në një qorrsokak të madh, ku kjo e fundit assesi nuk po arrin të gjejë një rrugëzgjidhje se si ta ndalin atë, siç thotë, për pazarin që po dëshiron ta arrijë me homologun serb Vuçiç.
Pa arritjen e ndonjë ujdie mes vete, opozitarët po shtyhen përmes postimeve në Facebook se kush po e kundërshton më tepër Thaçin; e, ndërsa zotohen se do ta ndalin presidentin, nuk japin një variant si do e bëjnë këtë gjë.
Në anën tjetër, kohë pas kohe opozitarët gjuajnë dhe njëri-tjetrin akuza të ndryshme. Rasti më i fundit ishte ai i deputetes së LDK-së, Valentina Bunjaku-Rexhepi, e cila tha se kryevetëvendosësi Kurti është i kapur nga partitë në pushtet dhe se nuk e do rrëzimin e qeverisë.
“Kërcënimi” i LDK-së…
Partia e parë opozitare, LDK-ja e Isa Mustafës që e bëri vet Thaçin president shprehet e bindur se do ta ndalë këtë të fundit në idenë e tij për korrigjim të kufirit me Serbinë.
“Kosova është një dhe e pa ndashme. Territori i Kosovës nuk mund të nxirret në pazar. Presidenti Thaçi duhet të ndalet. Presidenti Thaçi nuk ka mandat kushtetues për veprimet të tilla. Negociatat për territorin e Kosovës janë kundër kushtetuese dhe kushdo që hynë në lojëra të tilla do të bartë pasojat kushtetuese dhe politike”, thotë LDK përmes një kumtese.
Partia e Mustafës paralajmëron bashkërendime në Kuvend për të penguar vënien në pikëpyetje të sovranitetit dhe integritetit territorial të Kosovës nga Thaçi.
“LDK-ja do të refuzojë çdo marrëveshje që bëhet pa mandat të Kuvendit dhe pa pajtueshmëri të gjerë të forcave relevante politike dhe të qytetarëve”, thotë LDK por e lë të paqartë se si mund të ndalet Thaçi, pasi për të arritur pajtueshmëri me partitë duhet ta kenë një “Po” nga PDK e AAK.
“Kërcënimi” i Vetëvendosjes me protesta…
Si LDK, edhe Vetëvendosje po shprehet se Thaçi duhet të ndalet. Për dallim nga e para që këtë gjë e sheh përmes një koordimi mes partive dhe Kuvendit, e dyta zgjidhje të vetme sheh protestat brenda dhe jashtë institucionit ligjvënës.
Deputetja Albulena Haxhiu, ditë më parë përmes një konference ka thënë se Thaçi duhet të ndalet që të mos vazhdojë dialogun me Serbinë dhe se sipas saj një gjë e tillë mund të bëhet përmes protestave.
“Hashim Thaçi nuk duhet ta takojë presidentin e Serbisë, Aleksandër Vuçiç, pasi ai nuk ka mandat nga Kuvendi i Kosovës por as nga populli. Prandaj duke parë situatën aktuale, ne besojmë që është jashtëzakonisht e rëndësishme që të ketë mobilizim gjithëpopullor. Edhe për ta ndalur Thaçin por edhe për t’i ndalur dëmet po na vijnë nga ky person. Prandaj këtu nuk përjashtohen protesta as format tjera që mund t’i bëjmë brenda Kuvendit të Kosovës”, tha deklaruar Haxhiu.
Por LDK-ja, përmes deklaratës së fundit nuk ka lë të kuptohet se janë të gatshëm ta kundërshtojnë Thaçin në rrugë por as me protesta brenda Kuvendit.
Ndërsa opozita nuk dakordohet si ta ndalin Thaçin dhe këtë e bëjnë veç përmes deklaratave qoftë nga konferencat e shtypit apo postimeve në Facebook, presidenti do të vazhdojë rrugëtimin e tij drejt Brukselit dhe këtë do e bëj hiç më larg se më 7 shtator ku do të mbajë takimin e radhës me Vuçiç, kjo është konfirmuar tashmë nga BE.
Pra, opozita për ta ndalur Thaçin duhet të arrijë një koordinim mes vete dhe ta bëjë një plan konkret, në të kundërtën nuk do arrijnë ta stopojnë. /tesheshi.com/
