Koordinatori i OKB-së për çështjet humanitare, Stephen O’Brien, i ka kritikuar fuqitë botërore për paaftësinë për të gjetur gjuhën e përbashkët mbi një armëpushim që do të bënte të mundur shpërndarjen e ndihmave për banorët e Halepit, duke paralajmëruar për një katastrofë humanitare të pashembullt.
“Nuk do të shtirem. Jam i zemëruar, shumë i zemëruar,” u ka thënë O’Brien anëtarëve të Këshillit të Sigurimit të OKB-së, që po mbajnë mbledhjen e tretë brenda një muaji në lidhje me situatën në Halep, njofton agjencia e lajmeve AFP.
Ai ka deklaruar se ekzistojnë plane për dërgimin e ngutshëm të 70 kamionëve me ndihma humanitare në Halep në rast se arrihet një armëpushim.
O’Brien përsëriti apelin për një armëpushim 48-orësh në Halep, në pjesën lindore të së cilit 275.000 njerëz gjenden prej një muaji tashmë pa ujë, pa energji elektrike dhe pa ilaçe.
Rreth 1.5 milionë njerëz në pjesën perëndimore të qytetit po ndiejnë gjithashtu mungesën e nevojave elementare.
“Në Halep po rrezikojmë të jemi dëshmitarë të një katastrofe humanitare që nuk ka ndodhur gjatë pesë viteve të gjakderdhjes dhe masakrës në Siri,” ka ngritur zërin O’Brien.
Ai ka thënë se qyteti i dytë për nga madhësia në Siri është shndërruar në “sinonim të tmerrit” për vuajtjet e sirianëve.
O’Brien u bëri thirrje të gjitha vendeve me ndikim, në veçanti SHBA-ve dhe Rusisë, që të arrijnë sa më shpejt një marrëveshje për një armëpushim.
Asnjë autokolonë me ndihma nuk ka arritur në zonat e rrethuara të Sirisë në muajin gusht, ndërkohë që sulmet ajrore kanë goditur spitalet dhe shkollat.
Vetëm në muajin korrik ka pasur mbi 44 sulme në objektet shëndetësore në të gjithë Sirinë, përfshirë sulmet ndaj pesë prej nëntë spitaleve në lindje të Halepit, sipas burimeve të OKB-së.
Më shumë se 290.000 njerëz janë vrarë në konfliktin sirian prej fillimit të tij në mars të vitit 2011, ndërkohë që përpjekjet ndërkombëtare për t’i dhënë fund luftës nuk kanë patur sukses. /tesheshi.com/
