Me dhjetëra zyrtarë të Departamentit amerikan të Shtetit kanë nënshkruar një memo të brendshme ku protestojnë kundër politikës së Shteteve të Bashkuara në Siri dhe apelojnë për sulme të targetuara ushtarake kundër qeverisë së presidentit Bashar al-Assad.
Zyrtarët argumentojnë se qasja aktuale po funksionin kundër opozitës siriane dhe po ndihmon Assad të qëndrojë në pushtet. Memoja është nënshkruar nga 51 zyrtarë të rangut të lartë dhe të mesëm që këshillojnë për çështje të Sirisë.
Nuk është e pazakontë që kanale të brendshme në Departamentit e Shtetit të dalin kundër vijës zyrtare, mirëpo është e rrallë që një numër kaq i madh diplomatësh t’i japin zë kundërshtisë së tyre ndaj pozicionit të Shtëpisë së Bardhë.
Një zëdhënës i departamentit Amerikan të Shtetit pranoi qarkullimin e memos por refuzoi të japë komente mbi përmbajtjen e saj. Mediat ndërkombëtare i referohen burimeve të sigurta që thonë se memoja është dërguar për shkak se “status-quoja është e papranueshme”.
Dokumenti apelon që Uashingtoni të përgatisë një kërcënim të besueshëm për veprim ushtarak ndaj qeverisë Assad. Përndryshe, thuhet në memo, Damasku nuk do të ndjejë aspak presion për t’u ulur në bisedime e negociata me kryengritësit.
Një argument i tillë reflekton edhe shqetësimin se shkatërrimi i procesit të paqes të ideuar nga SHBA dhe Rusia po i shërben regjimit. Ka pasur dhunime të armëpushimit nga të dyja palët, si nga qeveria ashtu edhe nga opozita.
Por, presidenti Assad e ka sfiduar hapur marrëveshjen, dhe forcat e tij të mbështetura ushtarakisht edhe nga Irani dhe Rusia, duken se kanë për qëllim të marrin territore strategjike të tilla si qyteti kyç i Aleppos.
Qytetet siriane si Aleppo tashmë janë të shndërruara në rrënoja për shkak të viteve të gjata të luftës, por Moska argumenton se sulmet i ka të shënjestruara kundër xhihadistëve e këto sulme nuk përfshihen në armëpushim.
Por, sekretari amerikan i Shtetit, John Kerry, i cili ka nxitur grupet kryengritëse të ulin armët, po bëhet gjithnjë e më i frustruar pasi regjimi sirian vijon të ndryshojë faktet në terren, ndërsa ai bën thirrje për diplomaci.
“Shtetet e Bashkuara nuk do të qëndrojnë duarkryq dhe të përdoren si instrument që lejon një të ashtuquajtur armëpushim nga i cili po përfiton pala kryesore në dëm të të gjithë procesit”, tha ai së fundmi.
Kerry ka nxitur administratën për veprime më të ashpra kundër regjimit në mënyrë që të detyrohet të ulet në tryezën e negociatave dhe nënshkruesit e letrës kundërshtuese besojnë se ai do të jetë në favor të shqetësimeve që ata shprehin.
Megjithatë, e gjitha kjo nuk ka gjasa të ndryshojë poizicionimin e administratës Obama e cila ka vendosur si prioritetet luftën ndaj të ashtuquajturit ISIS në Siri dhe ka qëndruar haptaz larg luftës civile.
Presidentin Obama nuk e tërheq ideja e një konflikti të ri në Lindjen e Mesme pas rezultateve të dyshimta të ndërhyjeve në Irak, Afganistan dhe në Libi.
Sidoqoftë, pasardhësja e mundshme e tij në detyrë, kandidatja demokrate për zgjedhjet presidenciale, Hillary Clinton ka argumentuar në favor të një politike më bindëse në Siri, ku përfshihet edhe një mbështetje më e fortë për kryengritësit jo-islamistë .
Ndoshta edhe letra e zyrtarëve të DASH synon më shumë atë sesa sekretarin aktual të Shtetit.
Përgatiti: Juli Prifti – /tesheshi.com/
