Rrëzimi i një avioni rus dje mbi Gadishullin e Sinait në Egjipt, që u mori jetën 224 pasagjerëve dhe personelit të shërbimit, i ka bërë një sërë kompanish ajrore që ta shmangin këtë hapësirë ajrore në fluturimet e tyre.
Tre kompani fluturimi me prestigj ndërkombëtar, Emirates, Air France dhe Lufthansa, kanë marrë vendimin që të mos i lejojnë avionët e tyre të fluturojnë mbi Gadishullin e Sinait. Kompani të tjera mendohet se do t’i pasojnë ato në vendimin e tyre.
Ndërkaq, si British Airways dhe Easyjet kanë deklaruar se nuk kanë në plan t’i ndryshojnë rrugët e fluturimit për në Sharm el-Sheikh.
Avioni Airbus i kompanisë ruse Metrojet u përplas ditën e djeshme në pjesën malore të Gadishullit të Sinait pak minuta pasi u ngrit nga aeroporti në Sharm el-Sheikh.
Muhamed Hosam Kemal, ministri egjiptian që ka nën autoritetin e tij aviacionin civil, deklaroi në një konferencë shtypi se komunikimi mes pilotëve të avionit dhe punonjësve të kontrollit të trafikut ajror kishte qenë normal para aksidentit, e se nuk kishte pasur asgjë të parregullt. Siç njoftoi ai, avioni nuk kishte kërkuar ndryshim të drejtimit të fluturimit.
Gadishulli i Sinait është një territor i trazuar, ku shpesh ka përplasje mes forcave egjiptiane të sigurisë dhe grupimeve të ndryshme të armatosura. /tesheshi.com/
