Komisioni Evropian tha se po shqyrtonte futjen e autorizimeve emergjente për vaksinat kundër COVID-19 si një alternativë më e shpejtë ndaj kushteve më rigoroze të autorizimit të marketingut të përdorura deri më tani.
Ky veprim do të shënonte një ndryshim të madh në qasjen për aprovimin e vaksinave, pasi do të përfshinte përdorimin e një procedure të gjykuar të rrezikshme nga Bashkimi Evropian, e cila para se të shpërthente pandemia COVID-19 ishte e rezervuar vetëm për miratime të jashtëzakonshme kombëtare për të sëmurët terminalë, përfshirë pacientë me kancer, raportoi Reuters.
Ndryshimi i mundshëm vjen në një kohë kur ekzekutivi i BE-së dhe Agjencia Evropiane e Barnave janë nën presion në rritje nga ata që disa i shohin si miratime të ngadalta të vaksinave, duke çuar në vaksinim më të ngadaltë të qytetarëve në vendet anëtare të BE-së krahasuar me Shtetet e Bashkuara të Amerikës dhe ish-anëtaren e BE-së, Britaninë e Madhe.
“Ne jemi gati të diskutojmë me vendet anëtare të gjitha mënyrat e mundshme për të shpejtuar vërtetimin e vaksinës,” tha një zëdhënës i Komisionit Evropian në një konference shtypi.
Një opsion mund të jetë miratimi urgjent i vaksinave në nivelin e BE me përgjegjësi të përbashkët midis vendeve anëtare, tha zëdhënësi, duke shtuar se puna për këtë mund të fillonte shumë shpejt nëse qeveritë e BE mbështesin idenë.
Vendet e Evropës Lindore të Hungarisë, Sllovakisë dhe Republikës Çeke kanë miratuar vaksinat ruse dhe kineze përmes procedurave urgjente kombëtare.
Britania gjithashtu përdori procedurën e urgjencës për miratimin e vaksinave COVID-19. /tesheshi.com/
