Përpara zgjedhjeve vendore të kësaj të diele në Shqipëri, Kryetari i Komisionit të Helsinkit, Kongresmen Chris Smith dhe Komisioneri Kongresmen Robert Aderholt bënë thirrje për zgjedhje vendore të lira dhe të ndershme.
“Populli shqiptar meriton një shans të drejtë për të zgjedhur qeverisje vendore të përgjegjshme e të ndershme, gjë e cila është jetike për t’i ndihmuar ata për të arritur aspiratat e tyre për sundimin e ligjit dhe prosperitetin”,- thanë komisionerët në deklaratë.
Ata u shprehën se qytetarët shqiptarë duhet të jenë në gjendje të kenë besim se ata po marrin pjesë në një proces zgjedhor transparent, të lirë nga kërcënimi, ngacmimi, apo sulmet mbi kandidatët, mediat, zyrtarët e zgjedhjeve, apo votuesit.
“Për fat të keq, këto të gjitha janë fusha aktuale shqetësimi në Shqipëri dhe ne shpresojmë se këto zgjedhje do të vëzhgohen nga afër nga komuniteti ndërkombëtar, veçanërisht nga Organizata për Siguri dhe Bashkëpunim në Evropë, dhe nga grupet vendase brenda vetë Shqipërisë”,- vijuan ata.
Sipas OSBE-së, zgjedhjet e së dielës për kryetarë bashkish dhe këshillat lokal janë zgjedhjet e para që do të kryhen për njësitë e reja të qeverisjes vendore të miratuara nga parlamenti në vitin 2014 nga ku do të dalin 61 bashki të reja që do të zëvendësojnë 373 bashki dhe komuna.
Për 25 vjet, Komisioni i Helsinkit i SHBA ka monitoruar dhe inkurajuar Shqipërinë në zbatimin e angazhimeve të OSBE-së nëpërmjet vizitave në vend, seancave dëgjimore dhe informuese të Kongresit, si dhe deklaratave periodike. Përveç funksionit si Komisioner i Helsinkit, Kongresmeni Aderholt është aktualisht Zëvendës President i Asamblesë Parlamentare të OSBE-së
