Nga Ylli Pata
Për të pasqyruar marrëdhëniet reale mes kryeministrit, Edi Rama dhe kreut të Kuvendit, Ilir Meta duhet siç duket të ndjekësh të kundërtën e deklartave të tyre.
Kjo ka ndodhur edhe tre vitet e fundit, por dhe gjatë këtyre ditëve.
Si Rama ashtu edhe Meta kanë bërë të ditur se marrëdhëniet në koalicion janë të mira e kanë theksuar se së shpejti do të nënshkruhet kontrata e re parazgjedhore për ndarjen e pushtetit, ende pa e marrë atë.
Por kryetari i Kuvendit, në dy ditët e fundit ka dhënë të kuptojë se politikisht është e kundërta e Edi Ramës.
Vetëm disa ditë më pas suksesit të ndërkombëtarëzimit të çështjes çame nga Bashkimi Europian, kreu I LSI-së tenton të japë një reagim ndryshe si përfaqësues i Tiranës zyrtare.
Meta, si një manovër edhe kundër Shpëtim Idrizit që e eklipsoi në zgjedhjet e Dibrës, ja mbathi në kryeqytetin grek me të gjithë deputetët që kanë lidhje me Athinën apo që janë me kombësi greke.
Historiani Arben Lalla e ka vënë re këtë fakt dhe e shtroi si një gabim protokollar.
“Metën e shoqëron deputeti i Partisë Socialiste, Fatmir Toçi, bashkëshortja e të cilët është greke, Vangjel Tavo, deputet i LSI-së, i cili është me kombësi greke, Vangjel Dule i mirënjohur si antishqiptar, vlleh me kombësi greke, kryetar i PBDNJ, deputeti i PS, Anastas Angjeli me kombësi greke, deputeti i PD, Gjergji Papa, gjithashtu me kombësi greke”, shkruan Llalla.
Por kreu i PDIU-së, Shpëtim Idrizi nuk ka vonuar dhe i është përveshur Metës, gjatë një debati për çështjen çame në emisionin Top Show.
Idrizi u shpreh ndër të tjera se Meta nuk u duk shumë i qartë, nëse çështja e varrezave greke është e së shkuarës apo e së ardhmes, pasi pranoi deri diku se çështja Çame është e së shkuarës. Është fjala për qëndrimin e tij “europian”, pasi presidenti grek i kërkoi atij zgjidhjen e çështjes së varrezave greke.
Por më ashpër përgjigjen ia ka dhënë Edi Rama, i cili gjatë një takimi në Rinas për të pritur kardinalin e firmosur nga kreu i Vatikanit, ka shtrënguar duart me tom Doshin-armikun e betuar të Ilir Metës.
Kreu u qeverisë, disa herë në Shkodër ka dalë në publik në ambiente ku ndodhej edhe deputeti Tom Doshi, i cili ka tentuar të marrë ndonjë vështrim për trafik influence, por kurrë nuk ka shkëmbyer një tokje duarsh.
Doshi, i cili është i përjashtuar nga PS-ja, ndodhej në Rinas për të pritur dom Ernest Troshanin, që është nga fshati Trush i Shkodrës, nga është edhe Toma, e i cili ka pasur lidhje familjare me priftin e dekretuar kardinal nga Papa Françesku.
Por ai shtrëngim duarsh përbën një karshillëk të fortë për Ilir Metën, çka pritet të sjellë sërish përplasje verbale në koalicion.
Përparim Spahiu, deputeti I LSI-së që po “garon” për të zënë vendin e Ilir Metës, përsërit çdo ditë se kjo parti nuk duhet të hyjë në aleancë me PS-në nëse kjo e fundit nuk i jep mandatin e Kryeministrit.
Dhe ky duket se është një “pazar” që do të prishë siç duket marrëveshjen e 1 prillit.
Gjasat janë më të qarta se kurrë. /tesheshi.com/
