Pas largimit të Donika Kadaj-Bujupit nga AAK dhe Ilir Dedës nga Vetëvendosje, edhe partia opozitare Nisma për Kosovën e Fatmir Limajt, është prekur nga ky “virus”, pra i dorëheqjes së zyrtarëve nga partia.
Xhevat Bislimi, sekretar për Marrëdhënie me Publikun i NISMA-s dhe më parë deputet i PDK-së, ka dhënë dorëheqje nga kjo parti.
Përmes një statusi në Facebook, Bislimi, njëri nga themeluesit e NISMA-s, si arsye kryesore për dorëheqje e ka përmendur koalicionin parazgjedhor të ndërtuar me Aleancën e Ramush Haradinajt.
“Me ‘tërheqjen’ e Jakup Krasniqit nga kryetarllëku u tërhoqën ose nuk erdhën disa nga themeluesit dhe disa nga ata që kishin paralajmëruar ardhjen e tyre në NISMA! Tendenca në rritje për ta kontrolluar dhe ‘sunduar’ subjektin dy-tre veta dhe trajtimi i NISMA-s si ndërmarrje private e familjare i ‘detyroi’ edhe disa themelues tjerë të largohen nga kjo iniciativë! Ne që mbetëm na mbajti bashkëpunimi dhe bashkimi opozitar për kundërshtimin e dy marrëveshjeve tepër të dëmshme (me Serbinë dhe me Malin e Zi) dhe për ndryshimin e qeverisjes së korruptuar… Antimarrëveshja tinzare e ‘krerëve’ të NISMA-s me AAK-në për ta prishur opozitën e bashkuar ia vuri kapakun të gjithave dhe e fundosi këtë iniciativë politike! Prandaj, prej dje edhe unë nuk jam më pjesë e iniciativës NISMA për Kosovën”, ka shkruar Bislimi. /tesheshi.com/
