Sektoret e shërbimeve më të rëndësishme në Kosovë janë të korruptuara. Alarmi vjen nga drejtori i Agjencisë Kundër Korrupsionit, Shaip Havolli në një intervistë për Radion Evropa e Lirë. Ai ka treguar se shëndetësia, arsimi, gjyqsori, sektori i energjisë dhe i minierave janë më të prekur nga ky fenomen.
“Sipas raportit të Komisionit Evropian, por edhe sipas të dhënave të Agjencisë dhe institucioneve të zbatimit të ligjit, fusha e shëndetësisë, arsimit, gjyqsisë, sektorët e energjisë dhe minierave, në nivelin lokal dhe atë qendror janë të prekur nga kjo dukuri negative. Pra, do të thotë se në të gjitha nivelet, rreziku i korrupsionit është prezent”, thotë Havolli.
Ai theksoi se Raporti i Progresit të vitit 2015, fakton se ka një progres sa i takon luftës dhe parandalimit të krimit ekonomik, korrupsionit dhe krimit të organizuar. “Institucionet e zbatimit të ligjit kanë arritur që në vitin 2015-2016 të kenë disa suksese që janë për t’u vlerësuar, si puna e prokurorisë, ashtu edhe e agjencisë dhe e policisë. Prandaj, duhet të jemi optimistë, sepse këtë vit dhe vitin që vjen, institucionet e zbatimit të ligjit kanë patur progres dhe kanë filluar të shtojnë nivelin e hetimeve edhe për zyrtarë të lartë, duke u nisur nga ministra, zv.ministra, drejtorë, deputetë e personalitete të ndryshme”-theksoi ai.
Havolli ka shtuar se në disa raste është dashur ndërhyrja e këtij institucioni, për të pezulluar aktivitetein e kompanive, pasi janë ngritur dyshime se ka patur shkelje, sa i takon përvetësimit të tenderave.
“Edhe këtë vit, por edhe vitet e mëhershme, agjencia ka monitoruar një numër të madh të proçeseve të prokurimit publik, ku ka dhënë opinionin lidhur me shkeljet që janë gjetur dhe tek shumica prej tyre autoritetet kontraktuese kanë arritur ose t’i rishpallin, ose t’i anulojnë këto aktivitete, që janë dyshuar për shkelje. Është vlerësim i imi, prej që kam ardhur në agjenci, që ka filluar një edukim pak më i mirë i zyrtarëve të prokurimit. Ka një zhvillim pozitiv. Edhe vetë OSHP-ja, apo KRPP-ja kanë filluar t’i rishikojnë çështjet e proçeseve të tenderave, kështu që, mund të them se ka një lëvizje pozitive në aspektin e parandalimit, apo për shmangien e këtyre shkeljeve”, përfundoi shefi i Agjencisë Kundër Korrupsionit për Kosovën./tesheshi.com
