Komisioni Evropian të enjten u bëri thirrje vendeve anëtare të marrin masat e nevojshme për të luftuar koronavirusin sa më shpejt të jetë e mundur, për të parandaluar paralizimin e ekonomisë dhe jetës publike, pasi disa vende tani kanë më shumë njerëz të infektuar sesa në mars në kulmin e pandemisë.
“Duke qenë se disa shtete anëtare tani po përballen me më shumë raste sesa në kulmin e tyre në mars, është e qartë se kriza nuk është pas nesh. Tani është momenti vendimtar dhe të gjithë duhet të veprojnë me vendosmëri dhe të përdorin mjetet që kemi,” tha komsionerja shëndetësore Stella Kyriakides.
“Ne duhet të shmangim një situatë ku qeveritë nuk kanë zgjidhje tjetër përveç se të vendosin karantinë të përgjithshme, në dëm të shëndetit tonë mendor, ekonomisë dhe mirëqenies së fëmijëve tanë,” shtoi ajo.
15 përqind e njerëzve, imun ndaj COVID-19
Drejtori i Qendrës Evropiane për Kontrollin dhe Parandalimin e Sëmundjeve (ECDC), Andrea Amon tregon se identifikimi i shpejtë, testimi, izolimi i kontakteve me rrezik të lartë janë disa nga masat më efektive derisa të gjendet një vaksinë.
ECDC lëshoi të enjten një raport të ri të vlerësimit të rrezikut.
Sipas të dhënave të ECDC, në shumicën e rajoneve të vendeve anëtare të BE-së, Zonës Ekonomike Evropiane dhe Mbretërisë së Bashkuar, përqindja e popullsisë imune ndaj COVID-19 është nën 15 përqind.
Komisioni rekomandon më shumë teste, kontrolle më të forta sanitare dhe kapacitet më të fortë spitalor. /tesheshi.com/
