Eduart Ndocaj, deputeti më i ri i parlamentit shqiptar, por dhe më i rralli në soj që ka patur legjislativi i pasviteve`90, vijon të përcjellë deklarata gjysëm humoristike gjatë komunikimit të tij mediatik.
I njohur dhe me nofkën “kabujosi”, ai ka deklaruar së fundi se Ilir Meta është politikani më i ndershëm shqiptar. Kjo u tha prej tij gjatë emisionit Oktapod në Vizion Plus, përballë moderatorit Turjan Hyska. Në fakt, ai arriti në këtë konkluzion shumë thjesht, pasi u pyet se cili qe më i ndershëm: Rama, Meta, apo Basha?
“Meta!”, tha Ndocaj, duke sqaruar se të tillë e ka shpallur gjykata pas akuzave për korrupsion. Ndërsa Rama e Basha sipas tij ende nuk janë përballur me gjykatën, prej së cilës të dalin të ndershëm ose jo.
Një përgjigje po kaq “inteligjente” ai dha për pyetjen se si mundej që një njeri pa shkollë si puna e tij të shndërrohej në një biznesmen të suksesshëm në Itali?
Ndocaj tha se duke qenë pa shkollë, ai nuk bënte shumë llogari në biznes, kështu që dilte gjithnjë i fituar. Ndërsa sipas tij, ai që është me shkollë, duke bërë shumë llogari, ndodh që të dalë me humbje. /tesheshi.com/
