Nga Blendi Gashi
Tri blloqet e krijuara, koalicioni PDK-AAK-NISMA, ai LDK-AKR-Alternativa dhe “Vetëvendosje” gjatë këtyre ditëve të parafushatës ndonëse janë shprehur tejet të bindura se do fitojnë zgjedhjet e 11 qershorit, por asnjëra prej tyre nuk ka thënë se do arrijë 50 për qindëshin që do t’ia mundësonte krijimin e qeverisë. Kështu pavarësisht akuzave që po drejtojnë ndaj njëra-tjetrës, cilido bllok që del fitues pashmangshëm i duhet të bëj koalicion paszgjedhor. Por, edhe në këtë pikë ato janë shprehur të rezervuara se me kë do formonin qeverinë duke thënë se rrethanat do ndryshojnë pas zgjedhjeve.
Në këtë situatë nuk përjashtohet mundësia që të paraqitet problem në formimin e qeverisë siç ndodhi në vitin 2014-të.
Dhe kjo më gjasë do jetë më e mundshme të ndodh nëse koalicioni PDK, AAK, NISMA del fitues, që sipas sondazheve do dalë e para, pasi që LDK dhe Vetëvendosje kanë bërë të ditur se nuk hynë në koalicion me PDK-në edhe në kjo e fundit fiton zgjedhjet dhe u bën ofertë.
Nëse veç ndodh kjo sigurisht se “koalicionit të luftës” i duhet të gjejë pashmangshëm partner për qeverinë, çka edhe mund të marrë kohë dhe të çojë drejt një krize të re politike.
Se nuk pritet të sigurojnë asnjëri grup fitore absolute në zgjedhjet e 11 qershorit e thonë analistët politikë pas zgjedhjeve.
Por a do vijë situata në atë pikë që duhet intervenimi i ndërkombëtarëve për bërjen e qeverisë së re?
Analisti politik Donik Sallova, nuk beson që ndonjëra prej partive ose koalicioneve do t’i fitoje 50% te votave. Ai thotë se maksimumi që mund të arrijnë është 40% , dhe sipas tij këtë synim e ka koalicioni PDK-AAK-NISMA.
“Por do të varet shumë nga pjesëmarrja në zgjedhje. Do të varet shumë sa do të rritet Vetëvendosje! Madje unë mendoj që ajo mund të jetë faktor vendimtar në formimin e qeverisë pas zgjedhjeve, duke iu afruar shumë me vota koalicionit LDK-AKR. Besoj që kësaj radhe do të jetë më e vështirë përfshirja e minoritetit serb në qeveri, sepse tashmë ata janë radikalizuar. Besoj qoftë me Haradinajn kryeministër, qoftë me Kurtin serbët do të refuzojnë pjesëmarrjen në qeveri, veçanërisht Lista Serbe”, thotë Sallova për tesheshi. com.
Njohësi i rrethanave politike Faik Krasniqi, mendon se edhe “krahu i luftës” dhe “krahu i pacifistëve”, por edhe Vetëvendosje kanë gjasa të dalin fituese në zgjedhjet e 11 qershorit,.
Sipas Krasniqit, edhe nëse VV nuk del e para, pas zgjedhjeve do të jetë përcaktuese në formimin e qeverisë, sepse asnjëra palë nuk do të arrijë të fitojë shumicën për të qeverisur e vetme.
“Nëse LDK, AKR dhe Alternativa i fitojnë zgjedhjet, atëherë VV me shumë gjasë do t’i bashkohet këtij koalicioni për krijimin e qeverisë. Por nëse koalicioni i “krahut të luftës” del fitues dhe nuk arrin të marrë përqindje të mjaftueshme për të krijuar qeverinë, atëherë do të bëhen pazare të mëdha për transferimin e deputetëve nga partitë e tjera. Prandaj, nuk besoj që do vije puna që ndërkombëtarët të jenë prapë ata që do ndërhyjnë në ndërtimin e një koalicioni paszgjedhorë që do formonte qeverinë”, thotë Krasniqi për tesheshi. com.
Analisti politik Shefqet Dibrani, mendon se koalicioni PDK-AAK-NISMA do t’i fitojnë zgjedhjet por nuk thotë nëse do kapin apo jo 50 përqindëshin.
Ai nuk e përjashton mundësinë që të paraqiten vështirësi pas 11 qershorit në bërjen e qeverisë, por shpreson se Vetëvendosje të ketë rol vendimtar në proceset e ardhshme, dhe këtë mos ta lë të mbetet në duar të Listës Serbe.
“Shpresoj se format eventuale të preisonit ndërkombëtar për formimin e qeverisë së re të jenë më të rafinuara. Është parë roli amerikan në ndërtimin e qeverive në Shqipëri e Maqedoni, por edhe në rënien e qeverisë ‘Mustafa’, i cili ishte indikativ dhe pragmatik”, thotë Dibrani për tesheshi. com.
Njohësi i proceseve politike, Behxhet Shala, në një intervistë për mediat kosovare ka thënë se koalicioni PDK-AAK-NISMA dhe kandidati i tij për kryeministër, Ramush Haradinaj, ka një përparësi për t’i fituar zgjedhjet, por shton se ky koalicion do ta ketë problem formimin e qeverisë së re.
“Pas zgjedhjeve të 11 qershorit do të ketë zhvillime interesante, pasi sërish ndërkombëtarët do të ndërhyjnë për ndërtimin e një koalicioni, i cili për detyrë kryesore do ta ketë shtyrjen përpara të marrëveshjeve të arritura deri më tani”, ka thënë ai.
Kujtojmë se zyrtarisht fushata zgjedhore fillon më 31 maj dhe mbaron më 10 qershor, ndërsa zgjedhjet mbahen më 11 qershor. /tesheshi.com/
