Zyrtarët e Katarit kanë marrë një vendim përmes të cilit do të ndalohet përdorimi i alkoolit në rrugë dhe në vende publike gjatë Kampionatit Botëror të Futbollit në atë vend në vitin 2022.
Ky vendim, i cili mund të shtrihet edhe në hapësirat brenda stadiumit, ka të ngjarë të hasë në kritika nga tifozët e huaj, ndërkohë që FIFA më herët është gjetur nën zjarr për shkak të zhvendosjes së garave në stinën e dimrit, për të shmangur të nxehtit e padurueshëm të verës.
“Alkooli do të lejohet ‘në vende të largëta’”, tha Sekretari i Përgjithshëm i Komitetit Suprem, Hassan Al-Thawadi, njofton Russia Today.
“Nuk do të ketë konsumim të alkoolit nëpër rrugë dhe vende publike dhe ky është vendim final. Gjithçka sa i përket kësaj çështjeje do të jetë në përputhje me zakonet dhe traditat tona”, tha ai.
Edhe pse alkooli nuk është i paligjshëm në Katar, shitja dhe konsumi i tij është i kontrolluar rreptësisht dhe çdo konsumim në vende publike ose dehje konsiderohet shkelje.
Shtetasit e huaj që jetojnë në vend mund të aplikojnë për leje të veçanta që u lejon atyre konsumim të alkoolit, kurse hoteleve u lejohet gjithashtu të shërbejnë pije alkoolike. /tesheshi.com/
