Shqiptarët paguajnë 40 euro për kartonin jeshil, qoftë edhe për të dalë jashtë vendit për një ditë me automjetet e tyre. Tarifat janë vendosur nga viti 2014 dhe ajo është e vlefshme për dy javë.
Kreu i Autoritetit të Mbikëqyrjes Financiare, Ervin Koçi, shpjegon arsyet pse shqiptarët e paguajnë shtrenjtë këtë produkt.
“Kartoni jeshil është një produkt me te cilin kompanitë e sigurimit dalin me humbje. Unë mund t’ju konfirmojë se në 6-mujorin e parë të këtij viti, janë miliona euro dëm të paguara, vetëm si pasojë e aksidenteve automobilistike të ndodhura jashtë territorit të Shqipërisë. Di t’ju them se përqindja e dëmeve jashtë Shqipërisë është gati 5 herë më e lartë se brenda vendit”, u shpreh Koçi.
Ai shpjegon edhe faktin sepse vendet e rajonit, si për shembull Maqedonia, e ka këtë produkt me çmim më të lirë se Shqipëria.
“Maqedonia nuk ka këtë ekspozim që ka Shqipëria me vendet e Bashkimit Europian. Për rrjedhojë edhe kostoja e tyre do të jetë ndryshe nga ne. Unë mendoj se ky çmim reflekton koston reale te produktit”, shpjegon Koçi.
Në Shqipëri, kostoja e kartonit jeshil nis nga 40 euro deri në 400 euro në vit.
Por qytetarët zgjedhin ta presin në vendet fqinjë, për shkak të kostos më të lirë. /tesheshi.com/
