Janë 57 të infektuarit e fundit në Shqipëri përgjatë 24 orëve, duke shënuar kështu një tjetër rekord negativ në kushte lirie, gjë që po zhbën atë çfarë u arrit në 10 javë karantine, që nga mesi i marsit e deri në fund të majit.
Ritmi i ditëvë të fundit ka ngritur shqetësimin se strategjia nuk po funksion, e vendi rrezikon të t’i kthehet masave izoluese.
Vatrat mbeten po ato, me Tiranën kryeqendër, ndërsa një pjesë e Shqipërisë, për fat, vijon të mbetet e pastër, me zero infektime.
Sipas asaj ç’ka u raportua nga Ministria e Shëndetësisë në komunikatën ditore, gjatë 24 orëve të fundit janë kryer 362 testime për të dyshuar të prekur me Covid-19 nga të cilat janë konfirmuar 57 raste pozitive. Kruja ka numrin më të lartë të rasteve ditore, me 16 të prekur që lidhen me aktivitete biznesi dhe kontakte të tyre, e ndjekur nga Tirana me 14 raste, 9 në Vlorë, 8 në Shkodër, 6 në Lushnje, 2 në Pukë, 1 në Durrës, 1 në Fier. Ndërkohë që janë në hetim shumë raste të reja në Tiranë, Vlorë, Shkodër dhe Krujë.
Gjatë 24 orëve të fundit janë shëruar 5 qytetarë duke e çuar numrin e të shëruarve që nga fillimi i epidemisë në 1044.
Aktualisht në Spitalin Infektiv po marrin shërbim 47 pacientë, 7 prej tyre janë në terapi intensive dhe një i intubuar. Në vendin tonë janë aktualisht 441 persona aktivë me COVID-19, kryesisht në Tiranë, Shkodër, Krujë.
Autoritetet kujtojnë se disa masa nuk po respektohen, e se kjo sipas tyre është shkaku i përhapjes së infeksionit.
“Nisur nga fakti se po zbulohen raste pozitive në disa ndërmarrje, subjekte tregtare apo institucione të ndryshme publike dhe private, Ministria e Shëndetësisë dhe Mbrojtjes Sociale rekomandon bizneset, institucionet, kompanitë, kudo ku është e mundur puna nga shtëpia, të nxisin këtë mënyrë alternative për të frenuar përhapjen e Covid-19.
Kujtojmë edhe një herë se çdo rast i identifikuar, qoftë edhe pa shenja, duhet të izolohet dhe se thyerja e karantinës është e dënueshme pasi rrezikon shëndetin e qytetarëve. Me organet e rendit po intensifikohet puna për të garantuar respektimin e karantinës së detyrueshme për përsonat e prekur nga Covid-19.
Një kujtesë edhe për subjektet tregtare të shërbimit: maska apo barrierat mbrojtëse janë të detyrueshme dhe çdo shkelje do të dënohet sipas ligjt në fuqi”, u tha në deklaratë. /tesheshi.com/
