Më në fund, policia ka arritur që të zërë një grabitës kazinoje, duke bërë që të rikthehet dhe njëherë urimi “Bravo çuna” nga ana e kreut të Rendit, Saimir Tahiri.
Ilir Leli, 47-vjeç, u kap në flagrancë në tentativë për të grabitur nën kërcënimin e një pistolete një kazino tek rruga “Mine Peza” në Tiranë, pak pasi e kishte realizuar të njëjtën gjë tek Zogu i Zi. Në çastin e kapjes, atij iu sekuestrua një një pistoletë tip TT.
Këtij zhvillimi i është gëzuar ministri Tahiri, i cili ka postuar këto fjalë uruese për vartësit e tij: “Bravo Policisë Tiranë për kapjen e grabitësit të armatosur në kohë rekord. Në krye të detyrës në të gjithë vendin për festa. Gëzuar!”.
Në fakt, vjedhjet e kazinove, ashtu si dhe të bankave janë shndërruar në të zakonshme, aq sa dhe autorët e tyre rralë ndodhë të identifikohen dhe kapen më pas.
Dhe ky i kësaj të premte, është ndër rastet e rralla. /tesheshi.com/
