Kanadaja është e shqetësuar për kërcënimin e sigurisë kombëtare nga shtetasit që u bashkuan me grupimin famëkeq ISIS, të cilët do të kthehen në vend, tha të hënën kryeministri Justin Trudeau.
Në parlament, Trudeau u zotua të ndjekë penalisht ata që thyen ligjet antiterroriste të Kanadasë duke u bashkuar me ISIS, por tha gjithashtu se qeveria e tij do të përpiqet t’i riintegrojë ata në shoqëri.
“Ne e pranojmë se kthimi, qoftë edhe i një individi që u bashkua me grupin ISIS, mund të ketë implikime serioze të sigurisë kombëtare”, tha Trudeau.
“Ne do t’i mbajmë ata nën vëzhgim. Ne jemi gjithashtu këtu për t’i ndihmuar ata që të braktisin atë ideologji terroriste”, shtoi ai.
Sipas një raporti të kohëve të fundit të CBC, zyrtarët kanadezë janë të vetëdijshëm për rreth 180 bashkëkombas të tyre që u bashkuan me grupe militante të huaja. Rreth 60 janë kthyer në Kanada, sipas shifrave qeveritare të lëshuara në 2016.
Deri tani, vetëm dy të kthyer janë ndjekur penalisht nën aktin kundër terrorizmit të Kanadasë.
Ministri i Sigurisë Publike, Ralph Goodale javën e kaluar shpjegoi vështirësitë e mbledhjes së provave në zonat e luftës për ndjekje penale të suksesshme.
Ai megjithatë refuzoi përdorimin e vrasjeve jashtëgjyqësore të përdorura nga aleatët për të zgjidhur problemin, duke i thënë transmetuesit publik CBC se “Kanadaja nuk angazhohet në njësitet e vdekjes”. /tesheshi.com/
