Protesta e opozitës po mbyllet me një “trofe” simbolik duke djegur një bunkerin r ngritur në hyrjen e tunelit antiatomik të kohës së diktaturës.
Ka zgjatur më shumë se 3 orë protesta e opozitës në bulevardin “Dëshmorët e Kombit”, e cila ka shënuar incidente të vogla të përplasjes me policinë por edhe lëshimit së objekteve të forta dhe materialeve ndezëse.
Pas thirrjes nga podiumi për t’iu drejtuar Ministrisë së Brendshme për të hequr bunkerin, një pjesë e protestuesve të opozitës çanë llamarinat rrethuese dhe u futën në zonën ku është vendosur një bunker simbolik.
Fillimisht, protestuesit kanë hedhur gurë dhe sende të tjera të forta në drejtim të godinës së ministrisë duke thyer xhamat e dritareve dhe më pas kanë ndezur zjarr në bunker.
Pas kësaj disa protestues janë shfaqur me vare në duar dhe kanë nisur të godasin bunkerin, duke e dëmtuar atë.
Lëvizja e protestuesve nga pjesa e bulevardit përballë godinës së Kryeministrisë në drejtim të Ministrisë së Punëve të Brendshme, duket se ka zënë pa përgatitur forcat e policisë.
Protestuesit nuk hasën asnjë rezistencë, përveç llamarinave që dëshmojnë se godina e MPB-së është në rikonstruksion.
Megjithatë, pak pas mbërritjes së protestuesve u vu re prezenca e një grupi të vogël të forcave policore, por që janë tërhequr për të mos acaruar më tej situatën.
Protestuesve u janë bashkuar kreu i PD-së, Lulzim Basha, ish-kryeministri Sali Berisha dhe drejtues të tjerë të lartë të opozitës.
/tesheshi.com/
