Nga Bashkim Kastrati
Përhapja e shpejtë e fruthit gjatë verës së vitit të kaluar shkaktoi panik tek qytetarët e Kosovës. Shumë pacientëve të prekur nga fruthi u është përkeqësuar gjendja shëndetësore dhe për shkak të komplikimeve të shumta ka qenë e domosdoshme që të trajtohen në Klinikën Infektive të Qendrës Klinike Universitare të Kosovës (QKUK).
Që nga muaji qershor, prej që është paraqitur ky virus në mënyrë më masive, ka prekur mbi 1 mijë persona, ku prej tyre 613 janë hospitalizuar në Klinikën infektive në QKUK. Paniku u përhape në Kosovë kur u njoftua se dy nga të prekurit kanë vdekur pas prekjes nga fruthi.
Të prekurit nga ky virus, janë kryesisht fëmijë, por duhet theksuar se fruthi është përhapur edhe te të rriturit dhe ka prekur moshat deri në 50 vjeç. Ndërkaq drejtuesit e Klinikës Infektive kanë deklaruar se numri më i madh i të prekurve që kanë pasur komplikime nga fruthi nuk kanë qenë fare të vaksinuar. Kjo konfirmohet edhe nga institucionet tjera kompetente shëndetësore.
Në Institutin Kombëtar të Shëndetit Publik të Kosovës deri më tash janë marrë rezultate pozitive me fruth për rreth 600 persona, dhe të gjithë kanë qenë të pavaksinuar.
Shumë pacientë nuk ishin të vaksinuar dhe imunizuar nga fruthi
Prof.dr. Hamdi Ramadani, drejtor i Klinikës Infektive në Qendrën Klinike Universitare të Kosovës (QKUK), ka thënë për tesheshi.com se në kuadër të Klinikës Infektive në trajtim me sëmundjen epidemike të fruthit vitin e kaluar ka pasur 613 të sëmurë.
Ai thotë se ka pasur edhe raste me komplikime shëndetësore, por pas terapisë janë shëruar plotësisht. “Zona epidemike e fruthit ka qenë në Komunën e Lipjanit e Fushë-Kosovës dhe viset tjera të Kosovës”, thotë Ramadani.
Doktor Ramadani thotë se Klinika Infektive ka qenë e pajisur me staf profesionalë dhe me medikamentet e nevojshme edhe gjatë gjithë kësaj periudhe kohore kur ka pasur raste të shumta të të prekurve me fruth.
“Aktualisht në klinikë ka pesë raste që po trajtohen, kurse prej vitit të ri e tutje ka pasur 17 raste. Të gjitha këto raste pothuajse ishin të pa vaksinuar dhe imunizuar nga fruthi”, u shpreh doktor Ramadani.
Fruthi është një sëmundje ngjitëse dhe serioze e shkaktuar nga një virus që përhapet nëpërmjet kontaktit të drejtpërdrejtë dhe përmes ajrit. Ky virus mund të përhapet shpejt, sidomos në ato vende ku vaksinimi është nën shifrat 95 për qind të popullsisë.
Bazuar në një studim të Organizatës Botërore të Shëndetësisë (OBSH) dhe institucioneve tjera, viteve të fundit, sëmundja e fruthit është rishfaqur në Evropë, ku numri i njerëzve të infektuar që nga viti 2007, është trefishuar.
OBSH-ja thotë se vaksinat kundër fruthit, duhet menjëherë të shtohen në të gjithë Evropën dhe Azinë Qendrore.
Për shumë vite, në disa vende evropiane një grup njerëzish ka lobuar kundër vaksinimit me vaksinë të fruthit, duke dhënë se shkakton autizmin.
Por, epidemiologët në vend thonë se vaksinimi duhet të kryhet pasi është obligativ dhe nuk ka asnjë ndërlidhje me autizmin.
Infektologët në vend thonë se për 16 vjet me radhë nuk ishin paraqitur raste me fruth në Kosovë, deri në muajin mars të vitit 2017, kur kishte filluar të përhapet virusi. Kjo për shkak se Kosova ka një mbulueshmëri me vaksinim me mbi 95 për qind të popullatës. /tesheshi.com/
