Jusuf Islam, ish-këngëtari i famshëm i viteve ’70 të shekullit të shkuar, i njohur asokohe si Cat Stevens, e që më vonë iu kushtua besimit islam, ka vizituar së fundmi kampet e refugjatëve sirianë në Turqi.
Atij i ka bërë mjaft përshtypje trajtimi i refugjatëve, për t’u shprehur se Turqia ka bërë atë që nuk e bëri asnjë vend tjetër.
Pasi ka parë nga afër një kamp refugjatësh në Gaziantep, pranë kufirit me Sirinë, Jusuf Islam e ka përshkruar si të pakrahasueshëm atë realitet me atë çfarë kanë bërë vendet e tjera në këtë aspekt.
Media botërore, ka thënë ai në një intervistë për një televizion turk, nuk tregon realitetin e Turqisë dhe
të botës islame.
“Media e tregon Turqinë si një vend të errët dhe të rrezikshëm. Por pasi vizitojnë vendin, pasi shohin bukurinë e tij dhe mikpritjen e popullit turk, njerëzit mahniten. ‘Kjo nuk është ajo që kemi parë në media,’ thonë ata.”
Ai ka vënë në dukje përhapjen e shpejtë të propagandës antiislame në botë. Jusuf Islam i ka bërë thirrje botës muslimane të punojë e bashkuar kundër kësaj propagande.
“Ne muslimanët duhet të flasim mbi bukurinë e Islamit,” ka shtuar ai.
Vlerësimet e Jusuf Islamit për Turqinë në lidhje me trajtimin e refugjatëve pasojnë ato të Donald Tusk-ut. Presidenti i Këshillit Europian do të deklaronte para tre ditësh gojëplotë: “Sot Turqia është shembulli më i mirë për tërë botën se si duhet t’i trajtojmë refugjatët.” /tesheshi.com/
