Ish-kryeministri Sali Berisha mund të shkarkojë për 24 orë Lulzim Bashën, nëse e dëshiron një gjë të tillë. Deklarata e fortë është bërë nga Jozefina Topalli, një nga kundërshtaret më të ashpra të kreut të PD-së, i cili në listat e kandidatëve demokratë nuk përfshiu ish-kryeparlamentaren. Dhe duket se lënien jashtë Parlamentit, Topalli nuk e gëlltit dot, ndërsa shprehet se një vendim i tillë ishte pa llogjikë, arsye dhe i papritur.
“Është një vendim i familjes së Bashës, prandaj s’kam asgjë keqardhje. Më vjen keq që s’jam në Parlament, por s’më vjen keq që s’jam pjesë e grupit të tyre. Një pjesë e atij grupi nuk kanë lidhje me PD, nuk i lidh asgjë me Partine Demokratike, nuk i kam parë ndonjëherë të japin një kontribut për të djathtët, nuk i njoh”, shprehet Topalli.
Në vijim të akuzave ndaj Bashës, ajo rendit papërgjegjshmërinë që ai kishte në ushtrimin e funksioneve shumë të rëndësishme që kishte. Në këtë kuadër, Topalli thotë se gjatë 4 viteve të drejtimit të Bashkisë së Tiranës, ai nuk la asnjë gjurmë.
“Kryetar i Bashkisë së Tiranës, është njëlloj si të jesh kryeminister i këtij qyteti. Të jesh katër vite dhe të mos lësh asgjë, nuk e imagjinoj. Është detyrë, është premtim, është sfidë”, shtoi ajo.
Ish-deputetja deklaron se nuk e ka besuar asnjëherë që Lulzim Basha do ta çonte PD-në në nivelin tjetër, pasi e la Berisha. Ajo që ndodhi, sipas saj, është shumë e rëndë sepse të flirtosh dhe të jesh në opozitë nuk shkojnë të dyja bashkë.
Sipas saj Basha ka marre peng siglën e Partisë Demokratike. “Po të donte z. Berisha ta hiqte Lulin nga kreu i kesaj partie, kjo do të ndodhte brenda 24 orëve. Ai nuk e bën këtë, sepse Berisha kur dha doreheqjen tha që betejat e mia kanë mbaruar”, shtoi Topalli.
Sipas saj, të zije karrigen e Berishës në PD nuk ishte e lehtë. “Nuk ishte e thjeshte që pas ikjes së Berishës, dikush të zinte karrigen. Problemi është se të jesh kryetar i PD-së, së pari duhet të kesh autoritet moral, duhet të jesh i vërtetë, duhet të jesh frymezues, duhet të bësh beteja të forta, nuk mendoj se ndonjëren prej tyre e ka Basha. Nga 2005 deri në 2017, jane 12 vite në politike, ka pasur të gjitha shanset për të na bindur se ai mund të ishte një kryetar, por nuk e bëri. Ne shkodranet kemi një shprehje ‘nuk është me të bleme, asht me të leme’”, tha Topalli. /tesheshi.com/
