Sekretari amerikan i Shtetit, John Kerry, i ka paralajmëruar ditën e djeshme regjimin sirian dhe Rusinë se durimi i vendit të tij nuk është i pakufizuar, duke u kërkuar atyre ta respektojnë armëpushimin e “ngrënë”.
“Rusia duhet ta kuptojë se durimi ynë nuk është i pakufizuar; në fakt, është shumë i kufizuar, bëhet përgjegjës apo jo Esadi,” ka deklaruar Kerry. Komentet e tij janë bërë pas takimit në Oslo të Norvegjisë me homologun e tij iranian, Mohammad Javad Zarif-in.
“Eshtë e qartë se ndërprerja e luftimeve është e ‘ngrënë’ dhe në rrezik, e se ka rëndësi kritike të ketë një armëpushim të njëmendtë. Ne e dimë këtë, nuk kemi iluzion.”
Kerry ka bërë të ditur se ka përpjekje për të arritur një marrëveshje të re gjatë një apo dy javëve të ardhshme për një rivendosje të armëpushimit në tërë Sirinë.
“Ky është një moment kritik, dhe ne po punojmë shumë fort për të parë nëse mund të vijmë në një marrëveshje në një apo dy javët e ardhshme që të ketë kapacitetin për një zbatim më të plotë të armëpushimit në tërë vendin…,” do të deklaronte sekretari amerikan i Shtetit.
Që prej 27 shkurtit ka në fakt një armëpushim në Siri, të mbështetur nga SHBA-të dhe Rusia, por luftime të reja kanë shpërthyer në Siri në prill e këtej, duke shkaktuar viktima për çdo ditë në vendin e mbërthyer nga konflikti prej pesë vitesh. Bisedimet e paqes në Gjenevë, nën kujdesin e OKB-së, nuk kanë dhënë deri tani asnjë rezultat, e janë të bllokuara. /tesheshi.com/
