Pas reagimit nervoz të Thaccit pas Jo-së trishtuese të Brukselit ndaj liberalizimit të vizave për Kosovën, kanë vijuar dhe reagimet e tjera. Siç ndodh në këto raste, i është hapur oreksi opozitës për t’u shprehur.
Lëvizja ‘Vetëvendosje’, akuzon pikërisht qeverinë Thaçi-Mustafa për këtë dështim.
“Për katër vjet rresht pa ndalim, Hashim Thaçi e së fundmi dhe Isa Mustafa e plot zyrtarë ndërkombëtarë, këmbëngulën se liberalizimi i vizave dhe proceset integruese të Kosovës lidhen me “zemërgjerësinë” e Kosovës që qenë praktikisht koncesione ndaj Serbisë në dialogun e Brukselit.
Për gjithë këto vite kërkesës së opinionit të gjerë publike, të deputetëve nga opozita, të protestave e argumenteve të VETËVENDOSJE!-s për hetimin e dënimin e krimit të organizuar në nivelet e larta të qeverisjes iu përgjigjen me lëvdatat për lidership lidhur me “vendimet e vështira” lidhur me kërkesat e Serbisë.
Sa kohë lufta e pakompromis kundër kapjes së shtetit i lihet në dorë aktorëve kryesore që kanë realizuar këtë kapje, kriteret për liberalizimin e vizave nuk do të ndodhë. Sepse ato kritere lidhen me shtetin e së drejtës të cilin e kanë rrënuar Hashim Thaçi dhe bashkëpunëtorët e tij.
Krejt e kundërta ndodhi me Serbinë. Këshilli i Bashkimit Evropian ia hapi asaj dy kapituj të negociimit për anëtarësim”, thuhet në reagimin e VV-së.
Edhe kryetari i Prishtinës, Shpend Ahmeti, që është zyrtar i VV-së, ka fajësuar qeverinë e vendit për mosliberalizim të vizave të cilën e ka quajtur edhe gënjeshtare.
“Edhe pse kundërshtar i kësaj qeverie, nuk gëzohem fare për mosliberalizimin e vizave. Përkundër të gjitha koncesioneve që i bëri Kosova, ky liberalizim nuk erdhi. Siç ka thënë shumë herë Augustin Palokaj, vendimi për liberalizimin e vizave mirret nga Ministrat e Punëve të Brendshme të shteteve evropiave të cilët e dijnë që vetëm sivjet mbi 50 mijë kosovar kanë lëshuar vendin e tyre. Ata e dijnë që zhvillimi ekonomik nuk ka ndodhë. Ata e dijnë që korrupsioni është në nivel të lartë. Ata e dijnë që në udhëheqjen tonë ka shumë dallaverxhi. Së paku kjo gënjeshtër hiqet nga agjenda edhe një vit”, ka shkruar Ahmeti në Facebook.
Analisti politik, Imer Mushkolaj, në një shënim në Facebook ka thënë se me këtë klasë politike nuk ka as iberalizim e as shpresë.
“Vazhdojmë me izolimin. Me këtë klasë t’papërgjegjshme politike s’ka liberalizim vizash. S’ka as shpresë. Isë, Hashim, a po ju vjen marre?”, ka shkruar ai në Facebook.
Edhe opinionisti dhe profesori Lumir Abdixhiku ka reaguar ashpër ndaj mosliberalizimit të vizave për qytetarët e Kosovës.
Ai në Facebook ka thënë se mosliberalizimi është konfirmim i se politika e deritashme në Kosovë nuk ka sjellë progres e mbarësi.
“Vendimi për mosliberalizim të vizave për Kosovën – si të fundit në rajon – bën marren më të madhe evropiane ndaj Kosovës. Nderojnë me kapituj anëtarësimi e lavdërojnë me fjalë të mëdha pritësit e kriminelëve të dënuar në Serbi, liberalizojnë me viza qytetarët në Ukrainë e Kolumbi, e mbajnë të getoizuar “evropianët e rinj” në Kosovë – dhe në fund kërkojnë mirëkuptim e mirënjohje nga ne. Mirënjohje për çka?! Një vendim si ky është rikonfirmim për të satën herë se politikat e deritanishme në Kosovë, të hajnisë, korrupsionit, krimit, zaptimit, migrimit, ikjes e nënshtrimit nuk sjellin as mbarësi e as progres. Sjellin vetëm ngecje e turpërim – sjellin izolim, siç ndodhi këtë herë, vjet, parvjet e qe shtatë-tetë vjet rend. Është koha e fundit për zgjim e ridizajnim të politikës sonë – në paçtë një të tillë”, ka shkruar Abdixhiku në Facebook.
Analisti Astrit Gashi, thotë se me pas qytetarë që e duan vendin, i mbledhin pasaportat dhe i dorëzojnë krejt para qeverisë për vizë, pas lajmit se s’do të ketë liberalizim të vizave edhe më 2016-të.
“TMERR: Burime në qeverinë e sotme vjet thojshin se liberalizimi i vizave ka qenë premtimi kyç për ndërtimin e koalicionit qeverisës që e kemi sot. Madje edhe opozita e theksonte se u është premtu e njëjta gjë. E çka ndodhi tash që mbetëm të izoluar?
A ka përgjigje Kryeministri dhe Qeveria e tij?
Kam shpresu dhe kam refuzu me kërku vizë qe 1 vit sepse ju kam besu në këtë pikë! Vizën tash kom me kërku te ju! Pse nuk punuat?”, ka shkruar Gashi në Facebook.
/tesheshi.com/
