Turqia ka kritikuar atë që e ka konsideruar “një përgjigje të zbehtë nga ana e vendeve arabe” karshi vendimit të SHBA-së për të njohur Jerusalemin për kryeqytetin e Izraelit, njofton agjencia Reuters.
Ata, para fillimit të samitit të vendeve muslimane që pritet të mbahet të mërkurën në Stamboll, deklaruan se disa vende arabe akoma kanë frikë të mos zemërojnë Uashingtonin.
Presidenti turk Erdogan, i cili akuzoi Shtetet e Bashkuara se po injorojnë pretendimet palestineze për Jerusalemin Lindor, si dhe të drejtën ndërkombëtare, u ka bërë thirrje udhëheqësve të më shumë se 50 shteteve muslimane që të dërgojnë një përgjigje të përbashkët.
Sipas Reuters, Jerusalemi ku ndodhen vende të shenjta të hebrenjve, të krishterëve dhe muslimanëve, është vendi i tretë më i shenjtë për muslimanët, dhe ndodhet në zemër të mosmarrëveshjes izraelito-palestineze për dekada të tëra.
Njoftimi i presidentit Trump javën e kaluar për njohjen e këtij qyteti si kryeqytet i Izraelit, ka zemëruar shumë vende muslimane, por shumë pak prej tyre kanë dërguar paralajmërime siç bëri Turqia, e cila tërhoqi vërejtjen se ky vendim i Trump-it do të “shtyjë botën në zjarr të pafund”.
“Disa shtete arabe kanë pasur reagim të zbehtë. Duket se kanë shumë frikë nga Shtetet e Bashkuara”, tha Ministri i Jashtëm turk, Mevlut Çavusholu, dhe shtoi se disa vende nuk e kanë konfirmuar ardhjen e delegacionit në samitin në Stamboll.
Ai gjithashtu tha se ministrat e jashtëm të Emirateve të Bashkuara Arabe dhe Egjiptit do të mbërrijnë në Stamboll, ndërsa Arabia Saudite ende nuk ka njoftuar se në çfarë forme do të marrë pjesë në samit.
Të trija vendet kanë kontakte të ndjeshme me Turqinë, sepse ata mendojnë se partia qeverisëse e AKP-së ka lidhje me lëvizjet rajonale të cilat ata i kundërshtojnë.
Janë edhe disa shtete të cilat nuk kanë treguar se kë do të dërgojnë në samit, thotë Cavusholu, duke shtuar se në takimin e Organizatës për Bashkëpunim Islamik (OIC) duhet të kundërshtohet mentaliteti i Uashingtonit, “unë jam superfuqi, dhe mund të bëj çfarë të dua”.
“Ne do t’u bëjmë thirrje shteteve që ende nuk e kanë njohur Palestinën, ta bëjnë këtë tani. Ne duam që SHBA-të të heqin dorë nga gabim i tyre”, tha diplomati turk. /tesheshi.com/
