Ish-kryetari i Kuvendit të Kosovës, Jakup Krasniqi, ka thënë se kryeministri Isa Mustafa dhe zëvendësi i tij Hashim Thaçi, janë përgjegjësit kryesor pasi kanë nxitur situatën në vend duke dhënë deklarata policore. Ai ka shtuar se Policia e Kosovës nuk ishte në përgjegjësinë e saj kur u përlesh me deputetët opozitarë.
Krasniqi, shtoi më tej se veprimi i opozitës është i imponuar nga papërgjegjësia e koalicionit qeverisës.
“E kanë mandatin e popullit me qeverisë vendin por jo me ndarë popullin. Nga Zajednica ka lindur edhe Republika Srpska në Bosnjë”, ka deklaruar Krasniqi.
Krasniqi thotë se kryekuvendari Kadri Veseli nuk është dashur fare të thërrasë seancë pa arritjen e ndonjë marrëveshje mes palëve.
“Krerët e shtetit është dashur të ulen ta gjejnë një zgjidhje dhe të mos shihen përleshjet. Gabimi është i atyre që nuk po duan me zgjedh një problem të ndërlikuar”, ka thënë Krasniqi, në emisionin Rubikon të KTV-së.
Ai ka thënë se ka rënë kredibiliteti i të gjitha institucioneve të vendit, andaj ka thënë se zgjedhjet janë zgjidhja e vetme.
“Do të duhej të gjindej mundësia të krijohet një situate e re. Presidentja të bëjë një takim ku do të e ekzistonte mundësia që kryeministri t’i tërheqë ato nënshkrime. Ose të shikohet edhe mundësia të shkohet në zgjedhje të reja. Zgjidha më e mirë e padhimbje është shkuarja në zgjedhje”, shprehet Krasniqi. Ai tha se në rast se pas zgjedhjeve fitojnë partitë në pushtet, atëherë opozita duhet t’i kthehet rrugës demokratike.
I pyetur nëse partia NISMA për Kosovën është e gatshme të formoj koalicion me PDK-në apo LDK-në pas mbajtjes së zgjedhjeve, Krasniqi ka deklaruar se nëse opozita është serioze dhe e bashkuar për çështje nacionale, duhet të shkojë si koalicion i përbashkët në zgjedhje. Sipas tij nëse nuk do të ndodhte një gjë e tillë, atëherë kjo do të ishte e paktuptimë.
Ai tha se opozita ka qenë e përjashtuar pa të drejtë për ta thënë fjalën e saj për ligjin më të rëndësishëm për vendin, atë për buxhetin.
Në fund, kryetari i Këshillit Kombëtar të Nismës për Kosovën, ka paralajmëruar se mund të tërhiqen nga protesta e 28 nëntorit nëse do të ketë shenja dhune.
Krasniqi, ka thënë se NISMA do të protestojë dhe do të kërkojë që protestat të jenë të qeta, në të kundërtën nuk do t`i përkrahin, pasi nuk dëshirojnë kacafytjen me policinë.
Përgatiti: Blendi Gashi /tesheshi.com/
