Në veri të Mitrovicës janë vendosur pllakate me fotografi të deputetit serb Sllobodan Petroviq dhe të ish-ministrit në qeverinë e Kosovës, Aleksandar Jabllanoviq, të cilët shihen me plisa në kokë.
Përveç këtyre të dyve, në pllakate është vendosur edhe fotografia provokative e ish-ministres së Pushtetit Lokal, Mirjana Jevtiq, e cila vetëm pak ditë qëndroi në këtë post, pasi iu kërkua dorëheqja nga ana e përfaqësuesve të Listës Serbe.
Në këto pllakate shkruhet në gjuhën serbe dhe në alfabetin cirilik: “Ata janë turpi i popullit serb”, “Mustafa është kryeministri im, jo Vuçiq”, “Ka votuar për Kosovën e pavarur”, dhe “I ka premtuar Mustafës se do ta votojë ushtrinë e Kosovës”.
Burime të KosovaPress-it bëjnë të ditur se këto pllakate janë vendosur gjatë natës mes të dielës dhe të hënës nga anëtarë dhe simpatizantë të Partisë Përparimtare Serbe (SNS) në veri.
Sipas këtyre burimeve, kjo ka ndodhur si rrjedhojë e takimit të fundit të Listës Serbe, të zhvilluar me përplasje e tensione mes anëtarëve të kësaj Liste për shkak se Petroviq nuk ishte ftuar fare, si dhe të çështjes nëse Aleksandar Jabllanoviq ose Sllavko Simiq duhen të jenë në krye të Listës serbe. /tesheshi.com/
