Nga Bashkim Kastrati
Bllokimi i krijimit të institucioneve të reja vazhdon të krijojë probleme dhe pasoja të shumta. Përveç humbjes së mundësisë për arritjen e marrëveshjeve të reja me mekanizma financiarë ndërkombëtar, një nga problemet që po shkakton kjo vonesë është edhe pamundësia e rishikimit të buxhetit.
Mosrishikimi i buxhetit pamundëson kryerjen e obligimeve të parapara financiare. Gjithashtu pamundëson realizimin e projekteve që janë në proces të punës dhe pamundëson nisjen e projekteve të reja të parapara.
Pra pa krijimin e institucioneve, rishikimi i buxhetit nuk mund të përfundojë, çka nënkupton edhe pamundësi të rialokimit të mjeteve për ministritë, komunat dhe të gjitha agjencive tjera buxhetore.
Për shkak të mos rishikimit të buxhetit, veteranët e luftës së UÇK-së nuk i kanë marrë pensionet për muajin gusht. Shoqatat që përfaqësojnë veteranët, kanë paralajmëruar protesta masive nëse pensionet e tyre nuk dalin deri me 7 shtator.
Lidhur me këtë çështje kryeministri në detyrë Isa Mustafa ka deklaruar se do të shikohen të gjitha mundësitë që veteranët të marrin pensionet e tyre.
Moskrijimi i institucioneve, pamundëson edhe punën e Kuvendit të Kosovës, e rrjedhimisht pamundësohet edhe hartimi apo amandamentimi i ligjeve.
Konkretisht, në këtë periudhë kohore nuk ka qenë e mundur ardhja e mjeteve financiare nga Agjencia Kosovare e Privatizimit (AKP) për shkak se nuk është ndryshuar ligji për AKP-në. Dhe në këtë rast Ministria e Financave pati planifikuar që të ndajë 67 milionë euro për autostradën Prishtinë – Shkup dhe 136 milionë euro mjete të rregullta nga buxheti.
Kriza po vërehet në të gjitha fushat
Njohësit e fushës së ekonomisë thanë se në situatën aktuale të krijuar, pasojat më të mëdha nga moskrijimi i institucioneve të Kosovës, i bartë ekonomia, por edhe të gjitha fushat tjera.
Ata shprehin shqetësimin se problemet e grumbulluara në këtë periudhë kohore do të reflektohen edhe vitin tjetër.
Ekonomisti Mustafë Kadriaj ka thënë për tesheshi.com se që nga përfundimi i zgjedhjeve, ekonomistët kanë pasur frikën se mund të vije kjo situatë, e cila është e dëmshme për ekonominë e Kosovës.
“Tani e tutje vetëm do të fillojnë simptomat e krizës, sepse mos rishikimi i buxhetit i lë peng projektet në realizim e sipër, pra tani e tutje do të vërehet kriza në çdo aspekt. Nëse partitë politike në Kosovë janë bërë ekspertë të krijimit të krizave, ju mungojnë vetëm certifikatat ku mendoj që do ju jepej një certifikatë për të gjitha pa dallim si”njohëse të krijimit të krizave”, sepse populli i Kosovës nuk ka çka t’u jep më shumë”, thotë Kadriaj.
Ai mendon se populli i Kosovës është “kalitur” dhe se pak ka pritshmëri nga institucionet qeveritare, sepse është një popull punëtor, por sipas tij, dëmi më i madh është imazhi i Kosovës në aspektin ndërkombëtar si në rrafshin politik, e aq më shumë ekonomik.
“Nga ana e investitorëve të huaj tani e tutje Kosova shihet si një vend jo stabil për investime të mundshme. Me veprimet e pasinqerta të subjekteve politike çdo ditë e më shumë po japin argument që Kosova të del si një projekt dhe shtet i dështuar. Po këto subjekte po e shkelin me dy këmbë një mund dhe sakrificë po të këtij populli po ashtu edhe përkrahjen e miqve të Kosovës tanimë të ditur. Me këtë dua të them që partitë politike po dëmtojnë kauzën e Kosovës vetëm për interesat e liderëve të tyre”, u shpreh Kadriaj.
Përveç procesit të rishikimit të buxhetit për këtë vit, muaji shtator është periudha kur komunat duhet të përfundojnë dhe dorëzojnë tek Ministria e Financave propozimet dhe kërkesat për ndarje buxhetore për vitin e ardhshëm.
Kurs, deri në fund të muajit tetor, qeveria duhet të miratojë buxhetin e propozuar për të dërguar në Kuvend,i cili duhet të miratohet deri në fund të muajit dhjetor. /tesheshi.com/
