Nga Donat Maloku
Sistemi i drejtësisë, prokuroria dhe gjyqësia në Kosovë vlerësohet e dështuar, për shkak se niveli i korrupsionit dhe krimit të organizuar është në nivel të lartë.
Megjithatë, zyrtarët e këtyre institucioneve janë shtresa më e pasur në vend dhe vijojnë të shtojnë pasuritë e tyre për çdo vit.
Ata përveç që kanë shtëpi, banesa, toka, dhe mbajnë edhe nga dy apo tre poste, gjithashtu kanë shuma të mëdha para kesh të deponuara në bankë.
Në formularët e deklarimit të pasurisë, të bërë nga Agjencia Kundër Korrupsionit, prokurorët dhe gjyqtarët edhe këtë vit vetëm sa kanë trashur kuletën e tyre.
Portali mbarëkombëtar ‘tesheshi’, ka shikuar konkretisht se sa para të gatshme kanë deklaruar të deponuara në bankë drejtuesit e gjyqësisë dhe prokurorisë. Disa prej tyre kanë deklaruar shuma të mëdha parash të deponuara në bankë, derisa të tjerë vlera më të vogla.
Ja sa para kanë në bankë, Enver Hasani, Aleksandër Lumezi, Enver Peci…
Kryetari i Gjykatës Kushtetuese Enver Hasani sipas deklarimit të pasurisë ka një shumë të mire parash të ruajtura në bankë. Hasani ka deponuara në bankë mbi 43 mijë euro.
Kryeprokurori i shtetit Aleksander Lumezi ka deklaruar para të gatshme në emër të tij 13.243 euro.
Kryesuesi i Këshillit Gjyqësorë të Kosovës, Enver Peci, ka deklaruar të deponuara në bankë para 5.157 euro.
Kryetari i Këshillit Gjyqësorë Fejzullah Hasani ka të deponuara në bankë mbi 72 mijë euro.
Sylë Hoxha ish-ushtrues detyre i Prokurorit të Shtetit, njëherit kryetar i Këshillit të Prokurorëve të Kosovës ka të deponuara në emër të tij 2.952 euro.
Valdete Daka kryetare e KQZ-së, gjyqtare në KGJK ka deklaruar vetëm 950 euro para të deponuara në bankë.
Kryetari i Gjykatës Themelore në Prishtinë, Hamdi Ibrahimi, ka të deponuara në bankë mbi 4 mijë euro.
Kryetari i Gjykatës Themelore në Prizren, Ymer Hoxha, ka deklaruar se ka të deponuara në bankë 45 mijë euro.
Teki Bokshi, anëtar i Këshillit Prokurorial ka deklaruar para të deponuara në bankë mbi 17 mijë euro.
Shpresa Bakija, kryeprokurore e Prokurorisë Themelore të Gjakovës, ka deklaruar mbi 11 mijë euro para të gatshme mbi 11 mijë euro.
Elmaze Syka, kryetare e Gjykatës Themelore në Pejë në emër të saj ka deklaruar se ka të ruajtura në bankë 7.700 euro.
Bashkim Hyseni, kryetar aktual i Gjykatës Komunale në Ferizaj, sipas deklarimit posedon 1.187 euro të ruajtura në bankë.
Isa Shala kryetar i Gjykatës Themelore në Mitrovicë, në emër të tij ka të ruajtura vetëm 407 euro.
Bajram Hamitaga prokuror në Prokurorinë e Shtetit siç duket është në krizë, pasi ka deklaruar se ka para të gatshme vetëm 400 euro.
Jetish Maloku anëtar i Këshillit Prokurorial ka deklaruar para të deponuara në bankë në vlerë mbi 5 mijë euro.
/tesheshi.com/
