Nuk është rastësi që zgjedhjet në Serbi po trajtohen gjithnjë e më shumë si të afërta me ngjarjet që po ndodhin së fundmi në Shqipëri.
Madje pas deklaratës së Sali Berishës në Kuvend “për rrëmbim armësh” , duket se gjithçka është bërë imperative.
Siç mësohet, ditën e enjte në seancën plenare do të anonçohet nisja e procedurës për miratimin e reformës në drejtësi.
Partia Demokratike ka vendosur që të mos jetë prezente ndërkohë që bisedohet për aspektet e para teknike, pasi ka shpallur bojkotin 10 ditor, të njëjtë me kohëzgjatjen e përjashtimit nga punimet e Kuvendit të ish-kryeministrit Berisha.
Ndërkaq, e vetmja parti politike që nuk ka folur pas deklaratave të Berishës për armatosje si pro dhe kundër, ka qenë aleati kryesor i Edi Ramës; Lëvizja Socialiste për Integrim.
Partia e Ilir Metës ka bërë të ditur se ajo do ta votojë reformën në drejtësi, por kjo nuk mjafton, pasi për të miratuar ndryshimet kushtetuese duhen 92 vota, ndërkohë kur mazhoranca ka deri tani me gjithë PBDNJ-në së bashku, 88-të vota.
Në letra, Ramës i duhen vetëm 4 deputetë dhe tratativat realisht kanë nisur, por siç mësohet nga burime brenda mazhorancës, çështja është ende e pambyllur në koalicionin qeverisës.
Në takimin që Rama do të zhvillojë të mërkurën me kreun e Kuvendit, Ilir Meta, mësohet se do t’i kërkojë zyrtarisht futjen në procedurat parlamentare të reformës, pra një herë në komision dhe pas dy javësh në seancën plenare.
PS-ja do të kërkojë shprehjen me votë të të gjitha partive politike.
Nëse reforma nuk miratohet, siç dhe ka gjasa të ndodhë, atëherë kryeministri do të shpallë dorëheqjen e tij dhe automatikisht ky variant e çon vendin drejt zgjedhjeve të parakohshme pas 45 ditësh; një variant më i vrullshëm dhe marramendës së procesi në Serbi.
Ditën e premte, kryeministri Edi Rama është takuar me ambasadorin e SHBA-së Donald Lu dhe kryediplomaten e BE-së në Tiranë, Romana Vllahutin; të cilët vinin nga zyra e ish-kryeministrit Berisha, me të cilin diskutuan për deklaratën tronditëse në Parlament për armatosjen e popullsisë.
Dhe një ditë pas këtij takimi, Rama shpërtheu “bombën” e nisjes së dikutimit në parlament për reformën.
Kjo deklaratë duhet lidhur padyshim me atë që Edi Rama lëshoi një muaj më parë: “Po nuk u miratua reforma, vendi shkon në zgjedhje”. Përgatiti: Ylli Pata – /tesheshi.com/
