Internetin më të shpejtë në botë e ka Singapori, kurse më të ngadalshmin Jemeni, sipas një studimi të ri.
Për “shkarkimin” e një filmi të teknologjisë HD, në Singapor nuk të nevojiten më shumë se 19 minuta, ndërkohë që për të shkarkuar të nëjtin film në Jemen të nevojiten më shumë se dy ditë, njoftoi sot cable.co.uk britanik, pas analizimit të të dhënave të mbledhura nga grupi kërkimor M-Lab.
Sa u përket vendeve të rajonit, Hungaria ndodhet në vendin e 15-të në listën globale, Rumania zë vendin e 18, Sllovenia 25, Bullgaria 27 dhe Kroacia është mbi Serbinë, në pozitën e 40 me një shpejtësi prej 12.57 Mbps.
Maqedonia është e 59-ta sa i përket shpejtësisë së internetit, Bosnja e 61-ta, Mali i Zi i 71-ti dhe Shqipëria e 78-ta, kanë treguar testimet.
Gjatë 12 muajve me radhë deri me 10 maj të këtij viti, në mbarë botën janë kryer më shumë se 63 milionë testime të shpejtësisë së internetit.
Suedia, Tajvani, Danimarka, Holanda dhe Letonia kanë regjistruar një shpejtësi mesatare prej 30 Mbps, të cilën agjencia rregullatore britanike për telekomunikim Ofkom (Ofcom) e ka definuar si “super shpejtësi”.
Në të njëjtën kohë, 139 vende kanë një shpejtësi mesatare të internetit nën 10 Mbps, e cila është, sipas Ofcom-it, shpejtësia minimale që mund t’u përgjigjet nevojave të një familje tipike.
Në mesin e 30 vendeve me shpejtësinë më të madhe të internetit janë kryesisht vendet e Evropës dhe të Azisë, ndërsa në Afrikë, më tepër se gjysma e vendeve kanë performancën më të dobët, njoftoi cable.co.uk e cila ofron shërbime këshillimore për ofruesit britanike të internetit, TV dhe telefonisë. /tesheshi.com/
