Turizmi në Greqi pësoi një rritje me 116 % në periudhën 2009-2016, sipas institutit të statistikave të këtij vendi.
Madje ELSAT ka parashikuar që ky trend të vijojë edhe në këtë vit.
Turistët nga Bullgaria, Rumania, Serbia dhe Shqipëria kanë zgjedhur të kalojnë pushimet në Greqi, e cila është një ndihmë për vendin që u përball me recesionin e rëndë ekonomik. Recesioni shkaktoi një rënie të ndjeshme të çmimeve në Greqi, çka duket se ndikoi në rritjen e numrit të turistëve.
Referuar shifrave, turistët shqiptarë që kanë vizituar Greqinë kanë një rritje me pothuajse dy herë nga viti 2009 në 2016. Kështu në 2009 në vendin fqinj ka pasur 234 mijë turistë nga Shqipëria, ndërsa në 2016 shifra arriti në 491 mijë, raporton scan.
Gjithsesi, ekspertët dhe autoriteti i statistikave nënvizojnë se, turistët nga vendet e Ballkanit nuk shpenzojnë shumë, në krahasim me ata nga vendet e tjera të Europës. Kjo, pasi turistët ballkanas bëjnë udhëtime më të shkurtra, por më të shpeshta në Greqi, duke shfrytëzuar edhe afërsinë gjeografike. /tesheshi.com/
