Nga Mensur Krasniqi
Kriza e migrantëve, roli i Maqedonisë në këtë krizë, dhe zhvillimet aktuale politike kanë qenë temat për të cilat është diskutuar në takimin ndërmjert presidentit Ivanov dhe kreut të Këshillit të Evropës, Donald Tusk në vizitën e tij, sot në Maqedoni.
Presidenti Ivanov ka falënderuar Këshillin e Evropës në lidhje me ndihmën e dhënë Maqedonisë për tu përballur me krizën e migrantëve.
“Në takimin tonë ka dominuar tema e migrantëve, si dhe kriza politike pas zgjedhjeve të 2016-tës. Kemi përsëritur se Maqedonia është një vend tranzit për migrantët”, ka thënë Ivanov, duke shtuar se Maqedonia si tani edhe në të ardhmen do të ruaj kufijtë e saj, por edhe kufijtë e Evropës.
“Porosia e jonë është e qartë, na ndihmoni që t’ju ndihmojmë. Duke ndihmuar Maqedoninë ju e ndihmoni veten”, tha Ivanov.
Në lidhje me krizën aktuale, Ivanov tha se e ka informuar kreun e Këshillit të Evropës se nuk mund të merr asnjë vendim që është në kundërshtim me Kushtetutën, andaj nuk do të reterojë nga qëndrimi për mos t’ia dhënë mandatin kreut të LSDM-së, Zoran Zaev, pasi që ky i fundit sipas Ivanov ka pranuar Platformën e Tiranës si kusht për formimin e qeverisë, me ç‘rast është shkelur sovraniteti shtetëror.
“Edhe njëherë të përsëris: qëndrimi im nuk ndryshon për mandatin, nuk ndryshon. Pengesat legale dhe kushtetuese duhet të tërhiqen. Masat e mia janë preventive. Një qeveri e kushtëzuar është jo stabile dhe me konsekuenca negative. Liderët politikë duhet të implementojnë rekomandimet dhe jo Platforma që janë krijuar në shtete të huaja”, tha Ivanov.
Ai më tutje potencoi se Maqedonia si shtet duhet të fokusohet vetëm në realizmin e reformave për BE-së, meqë sipas tij kjo do të ishte mundësia për të dalë nga kriza.
Nga ana tjetër, edhe kryetari i Këshillit Evropian, Donald Tusk në një prononcim për media ka falënderuar Maqedoninë në lidhje me rolin e saj në përballjen me krizën e emigrantëve. Përpos kësaj, ai porositi partitë politike që bartës të proceseve për zgjidhjen e krizës politike janë vetë politikanët, ndërsa BE mund ta ndihmojë në formë rekomandimesh këtë proces. Ndryshe sipas tij me këtë politikë që po zhvillohet në Maqedoni, ky shtet e ka vendin larg BE-së.
“Erdha këtu me mesazh të fuqishëm nga liderët dhe institucionet e BE-së. Angazhimi i Bashkimit Evropian lidhur me perspektivën tuaj evropiane është i sinqertë. Avancimi drejt anëtarësimit në BE dhe NATO arrihet përmes unitetit. Unitet i cili është aq shumë i nevojshëm sot në vendin tuaj. Unë u përgjigja në letrën tuaj në lidhje me gjetjen e zgjidhjes për krizën. Kriza po e mban vendin larg BE-së, dhe është e juaj që të gjeni zgjidhje që do të bazohet në proceset demokratike, demokracinë parlamentare dhe logjikën e shëndoshë. Vetëm një zgjidhje e tillë do të jetë e qëndrueshme, ne do të jemi këtu që t’u ofrojmë ndihmë për proceset reformuese drejt BE-së”, ka thënë Tusk pas takimit me Ivanovin.
Ndryshe, me këtë porosi Tusk bëri të ditur se diplomatët këshillojnë, propozojnë, rekomandojnë, por nuk japin zgjidhje. /tesheshi.com/
