Gjenerali Momir Stojanoviç, ish-kreu i shërbimit sekret ushtarak të Serbisë dhe ish-deputet i opozitës, ka deklaruar se akuza ndaj shqiptarëve për vrasjen e Oliver Ivanoviçit është “qesharake”.
Duke folur për të përditshmen e Beogradit “Danas”, ish-kryespiuni serb, i cili ka qenë edhe kryetar i komisionit parlamentar për kontrollin e shërbimeve sekrete, ka ç’montuar tezën e hedhur nga Aleksandër Vuçiç, menjëherë pas mbledhjes së Këshillit të Sigurisë Kombëtare.
“Nëse shqiptarët do të donin ta vrisnin, mund ta bënin këtë kur të donin dhe jo tani që jo vetëm që nuk iu vlente por i prish punë më shumë se kurrë.
Mendimi im personal është se kjo është vrasje e motivuar politikisht, ose është vepër e grupeve kriminale në veri të Kosovës”, tha Stojanoviç.
Sipas ish-politikanit të opozitës, i cili tani është një analist për çështjet e sigurisë dhe ato rajonale, vrasja e Oliver Ivanoviçit menjëherë pas nisjes së negociatave në Bruksel ishte një sinjal i rëndë për destabilizim.
“Ivanoviçi ishte jashtëzakonisht i nderuar nga populli serb në Kosovë, i cili nga ana e tij nuk është dakord për një tradhti nga ana e Beogradit”, thekson gjenerali Stojanoviç, i cili shton se megjithatë metoda e vrasjes nuk përjashton se prapa të jenë grupet kriminale mafioze. /tesheshi.com/
