Nga Blendi Gashi
Sa e vështirë është që të drejtosh një parlament me politikë të trazuar, deri dhe konfliktuale heraherës? Këtë po e shohim këto ditë me çka po ndodh në Kosovë, që padyshim ndodh dhe në Shqipëri, por jo në përmasat e tanishme kur salla mbushet me gazlotsjellës. Dy prej ish-kryeparlamentarëve, Nexhat Daci dhe Jakup Krasniqi, padyshim që do nuk ta dëshironin sot që të ishin në vendin e Kadri Veselit, por që dhe ata kanë patur çastet e tyre të vështira, siç thuhet, kur të shkojnë djersët çurg prej sikleti.
Portali tesheshi.com ka zhvilluar biseda me ta për të marrë impresionet e një kohe të shkuar në drejtimin e Kuvendit të Kosovës.
Kryekuvendari i parë paslufte, Daci ka treguar disa raste kur ai është përballur me situata të pakëndshme, si momentin e vështirë kur Ibrahim Rugova haste në vështirësi për të fituar votat e ligjvënësve për t’u bërë president, për përleshjen mes dy deputetëve në hollin e Kuvendit, për fërkimin që kishte me një deputet opozitar, dhe për një rast kur mbështeti deputetin e PDK-së e jo deputeten e partisë së tij.
Edhe ish-kryeparlamentari Jakup Krasniqi ka treguar për portalin tesheshi.com momentet e vështira por edhe ato kur është ndjerë mirë pse ushtron një pozitë të tillë. Megjithatë, ai nuk e ka përmendur një moment që populli nuk do ta harrojë kurrë, rastin kur Krasniqi mbrojti mikrofonin e tij nga deputeti i ‘Vetëvendosjes’ Albin Kurti i cili nuk lejonte të hidhej në votim ratifikimi i marrëveshjeve me Serbinë.
Sikletet e Dacit
Është dashur të dërgohet një ekspert i parlamentit për në gjykatën e Hagës dhe kanë qenë të propozuar dy kandidatë, zonja Nekibe Kelmendi nga LDK, një avokate dhe mike e familjes, si dhe Arsim Bajrami, rektor i Universitet nga PDK. Në votimin e parë kanë qenë baraz në parlament. Atëherë, deputetët e opozitës, në atë kohë të PDK-së, më kanë pyetur se vota e juaj për kënd është. Po unë kam thënë se vota ime shkon për Arsim Bajramin, sepse kam menduar se rektor, profesor i Juridikut, dhe i duhet Kosovës. Pra, nuk i kam kqyrë interesat personale dhe të partisë sime.
Shkuarja në Drenicë
LDK në atë kohë (paslufte) nuk ka dasht me shku në Drenicë, nuk ka pas asnjë lloj kontakti se kanë ndodhur vrasjet e aktivistëve të LDK-së, mos shkuarja në Prekaz. Unë kam tregu se jam kryetar i Parlamentit dhe unifikues dhe në një vjetorin e vrasjes të Fehmi dhe Xhevë Lladrovcit me kryetarin e parlamentit të Shqipërisë kemi shkuar në këtë përvejtor dhe më pas në Prekaz. Unë kam vlerësuar dhe kam marrë vendim ajo që është në të mire të kombit, shtetit. Ka pasur momente që unë e kam rreziku ardhmërinë time sepse më kanë quajtur brenda LDK-së tradhëtar, kinse po i tradhëton interesat e LDK-së. Këta njerëz janë në pozita të ndieshme dhe asnjë vlerë as profesionale, as kombëtare vetëm të zhvatjes.
‘Konflikti’, me deputetin Emrush Xhemajlin
Unë mbaj mend një reagim të deputetit Emrush Xhemajli. Unë ia kisha dhënë fjalën një deputeti tjetër dhe ai më vjen para mikrofoni dhe thotë unë po dua të flas. Dhe unë i them Emrush, me emër se e njihja moti, se do ta marrësh fjalën, por së pari ja kam dhënë fjalën ‘Filan Fistekut’. Më tha nuk shkoj pa ma dhënë fjalën. I them Emrush të lutem shko në vend, unë këto ti sot fjalë këtu nuk merr, bën çka të duash dhe i them sërish Emrush shko në vend të lutem. Dhe më pas është tërhjek ai. Jo pse ai ka qenë frikacak, por ai ka dalë i mençur.
Rrahja e Gecit dhe Kocit në holl të Kuvendit
Rast tjetër. Janë rrah dy deputet të Drenicës, një i LDK-së dhe një i PDK-së. Gani Geci dhe Gani Koci dhe përleshje ka ndodh në holl. Kërkojnë me i dënu. Grupi i PDK-së ishte tërhjek ga seanca. Unë i them këshilltarëve po shkoj në Grup parlamentar të PDK-së. Unë kam shku, dhe ata janë habit në një moment. Është shumë e vërtet që asnjë deputet nuk më ka fye. Unë i kam thënë GP të PDK-së se duhet të kthehen në séance dhe do ta zgjidhim këtë rast. Ndërkombëtarët kanë kërkuar prej meje me i përjashtu nga seancat për një kohë të gjatë. I kam thënë Gani Gecit shko te shtëpia, dy javë nuk ke të drejtë me ardh, dhe ai e ka respektu vendimin tim dhe kemi mbetur shokë.
Votimi i Rugovës për president
Kur ka ardh çështja që Rugova të zgjidhet president unë e kam ndërpre votimin sepse Rugova binte në vote dhe e humbshim presidenten dhe e kam vazhdu betejën deri në zgjedhjen e Rugovës.
Sikletet e Krasniqit
Unë veçoj si ngjarje të një rëndësie të veçantë për vendin dhe kombin dhe mua si kryetar i Kuvendit të Republikës së Kosovës, seancën e cila e shpalli Pavarësinë e Kosovës dhe unë i komunikova rezultatin e votimit unanim për Kosovën shtet të pavarur.
Do të veçoja edhe Seancën e miratimit të Dokumentit bazik të shtetit siç është Kushtetuta. Këto janë momente që ndodhin vetëm njëherë në historinë e një kombi, ndonëse kombi ynë e pat fatin t’i ketë dy pavarësi.
Në legjislaturën e dytë të pavarësisë,ka pasur shumë momente që nuk jam ndjerë mirë. Në ketë rast do të veçoja zgjedhjen e presidentit pa respektuar Kushtetutën dhe miratimi i marrëveshjeve të Brukselit, pasi Kuvendi nuk e dinte se çka miraton.
/tesheshi.com/
