Ish-kryebashkiaku euroskeptik i Londrës, Boris Johnson, i cili në Partinë Konservatore britanike lobon për daljen e Britanisë së Madhe (Brexit) nga Bashkimi Evropian, ka thënë se ky union ka të njejtin synim të cilin e ka pasur Adolf Hitler në përpjekjet për të krijuar një supershtet të fuqishëm.
Në intervistën e dhënë për Daily Telegraph, ku ka punuar për një kohë si korrespondent nga Brukseli, Johnson ka paralajmëruar se, edhe pse burokratët në Bruksel përdorin mjete tjera në raport me ato të cilat i ka përdorur diktatori nazist, mbetet fakti se të dyja palët ndajnë të njejtin synim, atë të bashkimit të Evropës nën një autoritet.
Sipas Johnson, gabimet katastrofale të cilat i ka bërë BE-ja Unioni Evropian kanë shkaktuar tensione në mes të shteteve anëtare dhe i kanë mundësuar Gjermanisë të bëhet më e fuqishme dhe pastaj të ‘marrë përsipër’ ekonominë italiane dhe ta shkatërrojë Greqinë.
Johnson ka kërkuar nga britanikët që të tregohen “heronj të Evropës”, ta çlirojnë vendin dhe ta shpëtojnë Bashkimin Evropian nga vetvetja, duke votuar për daljen nga unioni në referendumin e datës 23 qershor.
Sipas mendimit të ish-kryebashkiakut londonez, dy mijë vitet e kaluara të historisë evropiane janë karakterizuar nga tentativat e herëpashershme për bashkim të Evropës nën një autoritet, me qëllim të rikthimit të kontinentit të vjetër “në kohërat e arta”, atë të kohës së Romakëve.
“Napoleoni, Hitleri, njerëz të ndryshëm kanë provuar këtë dhe përfundimi ka qenë tragjik. Por, në parim problemi qëndron në faktin se nuk ekziston një besnikëri fundamentale ndaj idesë së Evropës. Nuk ekziston një autoritet të cilën të gjithë e pranojnë dhe e kuptojnë”, ka thënë Johnson dhe ka shtuar se kjo “shkakton një boshllëk të madh demokratik”. /tesheshi.com/
