Ish-gardisti socialist i 21 Janarit, Agron Malaj, kandidat për kryebashkiak të Burrelit, ka reaguar për herë të parë duke mbrojtur veten nga akuzat e opozitës. Kjo pasi dy ditë më parë, emri i tij u përfol publikisht nga kreu demokrat Basha, gjatë një tubimi në qytetin e tij. Për Malajn, Basha tha se ai duhej të ishte pas hekurave, por ish-vartësi i tij me “armë në dorë”, ofron tjetër argumentim të pozitës së tij ditën e vrasjes së katër protestuesve në bulevard, ndonëse kryedemokrati e akuzoi për tjetër gjë.
“Më 21 janar 2011 unë nuk kam zbatuar urdhërat që vinin nga Ju dhe më lart për të qëlluar mbi qytetarët. Ju më akuzoni se guxova të mos respektoj urdhërat tuaj. Nuk ka mëkat të bësh detyrën e një komandant seksioni të njësisë speciale, por unë me atë detyrë nuk abuzova kurrë. Nuk qëllova kurrë mbi protestuesit, as unë dhe asnjë nga ata nën drejtimin tim. Ndaj ti më sulmon.
Kjo është e provuar ligjërisht nga drejtësia shqiptare, e cila brenda 48 orëve vendosi ndaj meje pushimin e çështjes sepse nuk kishte asnjë element të veprës penale.
Lulzim, njësoj si në 2011 kur nuk i kursyet shpifjet për të devijuar hetimet e 21 janarit nga përgjegjësit e vërtetë, një ndër të cilit jeni dhe Ju, njësoj shpifni edhe sot ndaj meje.
Ju ishit ministër i Brendshëm asokohe dhe i dini mjaft mirë fajtorët, i dini mjaft mirë kush i zbatoi urdhërat për të qëlluar mbi protestuesit.
Unë Lulzim, nuk kam abuzuar kurrë. Si atëherë në Gardën e Republikës, si në drejtorinë e OSHEE-së si drejtues i PS-së Mat dhe sot që kam privilegjin t’u kërkoj besimin për t’u shërbyer matjanëve”, shprehet ish-gardisti, tashmë i angazhuar politikisht me PS.
Edhe nga Rama është mbrojtur me këtë argument; që ai nuk ka shtënë mbi protestuesit. /tesheshi.com/
