“Koalicioni PDK-LDK e ka varrosur demokracinë në vend. Koha ka dëshmuar se nuk ka asgjë prej koalicionit aktual, vetëm punësim të militantëve partiakë”.
Kështu ka deklaruar ish-deputetja e AKR-sëm Myzejene Selmani në një intervistë dhënë për tesheshi.com.
Ajo ka folur edhe për krizën aktuale politike në vend, për partinë e saj që aktualisht është jashtë Kuvendit, për Gjykatën Speciale, liberalizimin e vizave…
Intervistoi: Blendi Gashi
Keni qenë për dy mandate deputete e AKR-së. Na tregoni çfarë angazhimesh keni tani pasi partia juaj nuk arriti të bëhet pjesë e Kuvendit?
Po, kam qenë dy mandate brenda Kuvendite të Kosovës si deputete, kur është shpallur Pavarësia e Kosovës dhe mandatin tjetër. Për momentin jam duke u marrë me partinë, AKR-në si parti me frymë liberale e cila po i mungon skemës politike kosovare.
Si politikane sigurisht që e ndiqni aktualitetin politik në vend. Cili është qëndrimi i partisë suaj karshi bllokadës së krijuar në Kuvend?
Është për t’u habitur deri ku ka shkuar kjo skemë e politikës kosovare kur dihet mirë se po ky kryeministër i cili e mbajti gjashtë muaj në bllokadë Kosovën duke qëndruar në VLAN dhe përmes AAK-së arriti të bëhet kryeministër i Kosovës. Tash prap, Kosova në bllokadë politike dhe ndihet aq komod që të vjen befasi për një kryeminstër i cili duhet të kërkojë dilaog me opozitën; se çështjet e Kosovës nuk janë kompetencë e kryeministrit dhe kabinetit qeveritar, por krejt partive që janë në Kuvend. Këtu ka dominuar koaliconi i numrave, i arrogancës së numrave, i jotransparencës, që e ka sjellë Kosovën pranë bllokadës së dytë brenda vitit.
Kryeministri para se të shkojë në Bruksel ka pasur mundësi të mbajë një debat parlamentar me opozitën, apo të merrte ndonjë përfaqësues nga opozita me vete në delegacionin e bisedimeve, pasi në pikëpyetje është çështja e Kosovës e jo çështje personale e kryeministrit.
Kuvendi po shkon drejt një anarkie totale ku arrestohen deputetët, ndiqen, sigurimi përdoret në seanca dhe mbahen seanca të improvizuara. Poashtu, miratohet ‘expres buxheti’ si dokument strategjik. Kjo është pakoment dhe e dhimbshme.
Qytetarët e Kosovës nuk e meritojnë një qeveritë të tillë. Duhet t’iu kërkohet falje publike qytetarëve të Kosovës sepse Kuvendi dhe Qeveria është degraduar, ka humb legjitimitetin.
Opozita është këmbëngulëse se nuk do të ketë normalitet pa u tërhequr nënshkrimet. Si e shihni zgjidhjen e krizës?
Opozita kërkon heqjen e nënshkrimeve, referendum ose zgjedhje të parakohshme. Nuk e di ku ka mbetur legjitimiteti i Kuvendit ose opozitës.
Presidentja i ka dërguar marrëveshjet në Kushteteuese, kjo është blerje kohe deri në miratimin e leximit të dytë të buxhetit.
Kryeministri së bashku me partnerin e koaliconit duhet t’i thërrasë liderët e partive politike në takim e të sqarohen, dhe nëse është nevoja të kërkohet edhe material shtesë nga Brukseli.
Si ish-deputete si e vlerësoni mbajtjen e seancave në salla të improvizuara dhe futjen e sigurimit në Kuvend. Po udhëheqjen nga kryekuvendari Kadri Veseli?
Hyrja e sigurimit në seancë para deputetëve të Kuvendit të zgjedhur nga qytetarët ka qenë një gjë e tmerrshme, pasi dihet mjaft mirë se Kuvendi është tempulli i demokracisë. Kur një kryeministër nuk mund të menaxhojë me opozitën, atëherë aty mungon liderizmi i tij.
Edhe kryetari i Kuvendit filloi në mënyrë demokratike udhëheqjen në Kuvend, por në fund përfundoi duke përdor sigurimin në seanca. Kjo gjë mbetet në ndërgjegjen e tyre.
Ka zëra që krizën në Parlament e ndërlidhin me Specialen?
Gjykata Speciale është votuar në Kuvend dhe nuk duhet që kriza të lidhet me këtë çështje. Edhe pse Specialja është e dhimbshme, të gjithë e dijnë se Kosova ka bërë luftë për çlirim, mirëpo ne besojmë shumë se pas kësaj djemtë tanë do të dalin të pastër se lufta e UÇK-së ka qenë lufte e tillë dhe se Kosova di ta menaxhojë edhe këtë sfidë.
Të flasim pak për koalicionin PDK-LDK. Si po qeverisin këto parti dhe a do të çojn mandatin deri në fund apo jo?
Koalicioni PDK-LDK e ka varrosur demokracinë në vend, ku dy partitë e mëdha formojnë qeverinë, demokracia vdes. Koha ka dëshmuar se nuk ka asgjë prej koalicionit aktual, vetëm punësim të militantëve partiakë, ndërsa në anën tjetër Kosova vlon nga korrupsioni, papunësia, nuk ka arsim cilësor, shëndetësi, shërbime cilësore për qytetarët, pra asgjë nuk ka ndryshuar.
A pritni që një krizë politike të ndodh edhe në fillimvitin e 2016-tës, Thaçi duhet të zgjedhet president sipas marrëveshjes së arritur mes PDK-së dhe LDK-së?
Këto dy parti vështirë se mund ta çojnë mandatin deri në zgjedhjen e Thaçit president, kur dihet se vet kryeministri Mustafa nuk është votuar nga partia e tij, andaj nuk pritet që deputetët e LDK-së ta votojnë Thaçin për të parin e shtetit.
Të kthehemi pak tek partia juaj. Në zgjedhjet e fundit nuk arritët të bëheni pjesë e Kuvendit. Ku është sot AKR-ja, pse kjo heshtje. A do të ketë zgjedhje brenda partisë suaj, nëse po kur dhe a priten ndryshime?
Në Aleancën Kosova e Re (AKR), nuk ka heshtje. Partia tek e cila bëj pjesë udhëheq me dy komuna (Gjakova dhe Mitrovica), në të cilat po punohet në aspektin ekonomik, hapjen e vendeve të reja të punës. Brenda AKR pritet të mbahen zgjedhjet, andaj jemi në përzgjedhjen e njerëzve të cilët do t’i bashkangjiten AKR-së dhe të rikthehemi aty ku partia e ka vendin, brenda Kuvendit të Kosovës.
Në rast se vendi shkon në zgjedhje të parakohshme a është e gatshme AKR dhe a prisni që të fitoni përkrahjen e popullit që t’i ktheheni Kuvendit?
AKR duhet të jetë çdo herë e gatshme për zgjedhje e sidomos tani që është jashtë Kuvendit. Besoj shumë që AKR do të ketë besimin e popullit dhe të jetë sërish parti parlamentare në vend.
Për fund, një pyetje të rrafshit tjetër, kur pritni që të ndodh liberalizimi i vizave për kosovarët?
Nuk pres të ndodh liberalizimi i vizave as në vitin e ardhshëm. Kjo që po e them është e dhimbshme sepse Kosova ka mbetur e izoluar ashtu si edhe qytetarët e saj të rinj, për shkollim, ide, por me këtë klasë politike larg jemi. /tesheshi.com/
