Vetëm disa muaj më parë ishte shpallur non- grata, kurse sot ai vizitoi Prishtinën.
Lubisha Dikoviq, shefi i shtabit të ushtrisë së Serbisë, ka qenë në kryeqytetin e Kosovës, ku është takuar me komandantin e KFOR-it, Guglielmo Luigi Miklietta për të firmosur një marrëveshje për lejimin e fluturimeve në hapësirën e Serbisë nga ana e trupave të KFOR-it.
Gjenerali Dikoviq, i cili akuzohet si autori i krimeve të shumta gjatë Luftës së Kosovës, në vitet e shkuara nuk është lënë të vizitonte Prishtinën. KFOR, bisedimet teknike me ushtrinë serbe i bënte jashtë territorit ë Kosovës, ose në Serbi ose në Maqedoni.
Hashim Thaçi, me anë të një urdhëri ekzekutiv e kishte shpallur non-grata vetëm në mars të këtij viti.
Izbica, Çikatova, Qirezi janë vetëm disa nga fshatrat e Drenicës që në momentet kur flitet për to të shkojnë në mendje vrasjet dhe krimet e kryera aty nga serbët në pranverën e vitit 1998.
Përgjegjësia për këto vrasje, sipas dokumentacionit nga Tribunali i Hagës dhe dëshmitarëve okularë e oficerëve serbë, të mbledhura nga Fondi për të Drejtën Humanitare, bien mbi Brigadën Motorizuese 37, e udhëhequr atëkohë nga gjenerali Ljubisha Dikoviq.
Përveç këtyre, edhe varrezat në Rashkë dyshohet të jenë vepër e shefit të ushtrisë serbe, pasi ekzistojnë fakte që trupat e shqiptarëve janë bartur nga Drenica për në Serbi, bartje që është kryer nga brigada që është udhëhequr nga Dikoviqi.
Ky dyshim forcohet edhe për faktin se vetëm pak metra larg vendit ku u gjetën trupat e mbi 50 shqiptarëve në Rashkë ndodhet edhe kazerma e Brigadës së Dikoviqit.
Por, pavarësisht kësaj, institucionet e Kosovës nuk e kanë thënë asnjë fjalë të vetme për vizitën e njeriut që mbahet përgjegjës për disa nga masakrat më të mëdha në Drenicë. /tesheshi.com/
