Në prag të balotazhit të 19 nëntorit për zgjedhjet lokale, kryetari i LDK-së, Isa Mustafa, ka akuzuar Lëvizjen Vetëvendosje se ka bërë propagandë gjatë 4 viteve në Prishtinë.
Sipas tij, VV ka shfrytëzuara makinën Audi Q7 për të bërë propagandë, ndërsa ka vazhduar më tej duke thënë se blerja e një veture të tillë nuk është luks, por nevojë.
Përmes një statusi në Facebook, Mustafa është i bindur se Abrashi do ta fitojë garën ndaj Ahmetit duke thënë se do të merret me projekte zhvillimore.
“Shfrytëzimi i një makine Audi Q 7 nga Vetëvendosje për të bërë propagandë katër vjet rresht, dhe mbajtja e asaj makine në ballinat e mediave kosovare, ‘u shti, s’u shit; ankandi i parë, i dytë, i trete …, u shit më lirë sesa që është blerë…’, është fenomen i ri në propagandën postbolshevike. Katër vite trumbetuan për 70 dosje të dërguara në Prokurori të shtetit kundër qeverisjes së Isa Mustafës. Rezultoi, sipas Prokurorisë, se në ato dosje nuk është vërtetuar përgjegjësia ime. Por propaganda e bëri të veten”, shkruan Mustafa në Facebook.
Kreu i LDK-së më tej thotë se nuk beson që Abrashi do të merret me sajime të dosjeve dhe me propagandë.
“Arban Abrashi është përcaktuar të realizojë projekte zhvillimore duke e respektuar ligjin. Ai, sigurisht, do të ndërpresë të gjitha procedurat joligjore në komunë, të cilat janë mbuluar me propagandë. Me Arban Abrashin, qytetarët do të lirohen nga propaganda, por do të fitojnë në zhvillim të Prishtinës dhe në zgjidhjen e shumë kërkesave dhe problemeve të tyre”, thotë Mustafa. /tesheshi.com/
