Kryeministri Kosovës, Isa Mustafa, mori pjesë në takimin iniciues për hartimin e Strategjisë Kombëtare për Zhvillim 2021, ku ishin të pranishëm anëtarët e grupeve punuese nga të gjitha ministritë që do të punojnë në hartimin e strategjisë.
Gjatë takimit, grupet punuese u informuan për aspektet teknike dhe koordinuese që do të përcillen gjatë procesit të hartimit të strategjisë.
Mustafa deklaroi se Strategjia Kombëtare për Zhvillim përfaqëson një qasje gjithëpërfshirëse në kontekstin e adresimit të sfidave më kritike të zhvillimit të Republikës së Kosovës. Kjo strategji përndryshe do të jetë një dokument planifikues që do të përmbajë një pako të prioriteteve gjatë pesë viteve të ardhshme, do të thotë nga viti 2016 deri në vitin 2021.
Ai po ashtu ka theksuar se Kosova ka pasur rritje të zhvillimit përgjatë dekadës së fundit. Edhe pse kemi pas rritje ekonomike, kjo rritje kryesisht është bazuar në investime publike dhe jo në sektorin privat të ekonomisë. Sipas tij Strategjia për Zhvillim Kombëtar vjen si rezultat i të kuptuarit se sfidat zhvillimore të Kosovës më së miri mund të adresohen duke zhvilluar një kornizë të prioriteteve dhe po ashtu duke përkufizuar afatet dhe mekanizmat e jetësimit të këtyre prioriteteve.
Më tej ai ka theksuar se duhet ta kemi parasysh se procesi i hartimit të Strategjisë nuk duhet të shihet si një dokument statik, i pandryshueshëm, i palëvizshëm, por si një platformë dinamike e të konsultuarit dhe dakorduarit me të gjithë akterët kryesor, si Qeveria në tërësi, Kuvendi, shoqëria civile dhe sektori privat, sektori bankar dhe partnerët e brendshëm dhe të jashtëm zhvillimor.
I pari i Qeverisë është zotuar se do të do të angazhohet në mbarëvajtjen e procesit të hartimit dhe më pastaj edhe në implementimin e të gjitha objektivave tona të cilat do t’i përcaktoj Strategjia Kombëtare për Zhvillim.
“Kërkoj që të jemi shumë të hapur, shumë inventiv, dhe ta kuptojmë se nga ajo që ne do të japim si kontribut tonin në këtë Strategji, do të varet suksesi i ardhshëm i zhvillimit ekonomik, përkatësisht fokusimi jonë në prioritete të cilat domosdoshmërisht duhet të jenë të qarta, duhet të jenë të realizueshme dhe duhet t’i shërbejnë zhvillimit ekonomik të vendit”, ka thënë ai. /tesheshi.com/
