Nga Presidenca bëhet me dije se posedohet një video (nënkupto: me natyrë përgjuese), ku pretendohet se ka fakte kompromentuese lidhur me atë që po ndodh me emërimet në Gjykatën Kushtetuese.
“…brenda javës Institucioni i Presidencës do të publikojë një VIDEO me fakte të pakundërshtueshme për opinionin vendas dhe botëror, që të mos ngelet asnjë analfabet në planet, i cili të mos e kuptojë dhunimin që një bandë ka tentuar t’i bëjë Kushtetutës dhe Gjykatës Kushtetuese të Republikës së Shqipërisë.
Kjo VIDEO me prova të pakundërshtueshme, do zbulojë fytyrën e vërtetë të një individi të papërgjegjshëm, i cili guxoi në mënyrë të tmerrshme kriminale t’i përvetësojë kompetencat kushtetuese Presidentit të Republikës, që as noterja e nderuar znj.Miranda Xhemalçe nuk pranoi ta bënte, pasi e dinte shumë mirë se betimi me dorën mbi Kushtetutë bëhet vetëm në Institucionin e Presidentit të Republikës dhe askund tjetër.
Përveçse në gjuhën tonë të bukur shqipe, kjo VIDEO, po përgatitet edhe në anglisht, në gjermanisht, në italisht, në frëngjisht, dhe në disa gjuhë të tjera europiane, në mënyrë që të gjithë partnerët tanë ndërkombëtarë, që janë të interesuar, jo vetëm për realizimin me sukses të Reformës në Drejtësi, që u votua me konsensus, por edhe që janë kaq të shqetësuar për problemet skandaloze të funksionimit të shtetit të së drejtës në Shqipëri, të mos mashtrohen më.
Në këtë mënyrë, jo vetëm mbrojmë Kushtetutën e Republikës dhe të drejtat e të gjithë qytetarëve shqiptarë, por edhe tregojmë përgjegjshmëri për të gjithë taksapaguesit e vendeve partnere, që paguajnë aq shtrenjtë që ky vend i NATO-s dhe nesër i BE-së, të arrijë standardet e tyre, të shtetit ligjor dhe të demokracisë”, thuhet në një njoftim nga Presidenca, ku sië mund të nuhatet, aludohet për kreun e KED-it Adrian Dvorani, të cilin Meta e ka akuzuar rëndë këto ditë.
Por ka diçka ironike në këtë zhvillim. Dikur i goditur politikisht me anë të një videoje, Meta vendos tani që të përdorë të njëjtën metodë. E kjo kundër një ish-gjyqtari në procesin e tij (pra video-ja e famshme me bllok në dorë), i cili ka qenë kundër shpalljes si i pavajshëm. Ky është Ardian Dvorani, kreu i Këshillit të Emërimeve në Drejtësi. /tesheshi.com/
