Kreu i opozitës, Lulzim Basha i cili ndodhet në Shtetet e Bashkuara, thotë se ka marrë mbështetjen e zyrtarëve amerikanë për kauzën e protestës, zgjedhje të lira dhe të ndershme. Në një intervistë për “Zërin e Amerikës”, Basha përsëriti qëndrimin e opozitës për zgjedhje me qeveri teknike, duke nënvizuar se për këtë ka siguruar edhe mbështetjen e zyrtarëve amerikanë, gjatë vizitës që po zhvillon në Uashington.
“Ne jemi një lëvizje popullore për zgjedhje të lira e të ndershme. Qëndrimi ynë është i qartë, nuk do lejojmë zgjedhje farsë. Qëndrimi i PD është për një qeveri teknike që do të organizojë zgjedhje të lira”, ka deklaruar Basha.
“Në Shtetet e Bashkuara mora mbështetje për kauzën e zgjedhjeve”, theksoi Basha, duke risjellë në vëmendje frazat e deklaruara në çadrën e protestës, në 34 ditët e saj se zgjedhje me Edi Ramën kryeministër dhe me krimin në pushtet nuk do të ketë.
“Proceset demokratike në Shqipëri po asgjësohen nga kriminelët. Aleatët tanë duhet të informohen si duhet, pasi lobistët e paguar po fshehin të vërtetën. Pengesa për në BE është kriminalizimi total i shtetit”, ka shtuar Basha. /tesheshi.com/
