Anëtarësimi i Malit të Zi në Aleancën e Atlantikut Verior i ka mbyllur një shteg influencës ruse në rajon.
Megjithë parajmërimet dhe komentet mbi këtë ndikim, ish-shefi i Shtabit të Forcave të Armatosura Jeronim Bazo e sheh Adriatikun si një liqen të Natos.
“Meraku dhe shqetësimi ynë është që këto vende të brishta, nga kuptimi i institucioneve demokratike, mos të krijojnë një terren të përshtatshëm për t’u shfrytëzuar nga ana ekonomike fillimisht e më pas nga influenca politike të një aktori të tretë”, thotë Bazo.
Në vijim ai shton se gjithmonë ka përpjekje për ndikime të rrymave të ndryshme, përfshirë këtu edhe influencën ruse, por Shqipëria nuk është e ekspozuar.
“Në skakierën e interesave gjeopolitike në rajon, në Europë, gjithësekush mundohet të shfrytëzojë zona influence, të shfrytëzojë të çarat dhe plasaritjet që mund të ndodhin në njërin kamp ose në tjetrin.
NATO dhe ne nuk jemi në ndonjë garë me aktorin e tretë se kush do të ketë më shumë influencë në këto vende të brishta që nuk janë anëtarë të NATO-s. Ne nuk bëjmë lojë të pisët”, shprehet ai. /tesheshi.com/
