Nga Bashkim Kastrati
Fitorja e Lëvizjes “Vetëvendosje” në Komunën e Prishtinës ka qenë sa e pa pritshme aq edhe ndoshta e padëshiruar nga partitë tjera më të mëdha. Në këtë kontekst bashkëpunimi i Komunës së Prishtinës me nivelin qendror nuk ka qenë në nivelin e duhur gjatë mandatit të Shpend Ahmetit si kryetar i Prishtinës. Komuna e Prishtinës ka pasur përplasje të kohëpaskohshme me Ministrinë e Administrimit dhe Pushtetit Lokal, me Ministrinë e Financave për rastin e blerjes së autobusëve, me Ministrinë e Infrastrukturës për bashkëfinancim të rrugëve etj.
Të shpeshta kanë qenë edhe replikat me Ministrinë e Drejtësisë, përkatësisht me zëvendësministrin Lirak Çelaj, i cili është asamblist në Komunën e Prishtinës. Asamblist në Komunën e Prishtinës është edhe Ministri i Zhvillimit ekonomik Blerand Stavileci dhe Ministri i Bujqësisë, Pylltarisë dhe Zhvillimit Rural Memli Krasniqi. Mbajtja e dy posteve të tilla në Kosovë nuk është e ndaluar me ligj.
Por dihet se mbledhjet e Kuvendit Komunal të Prishtinës shpesh shoqërohen me tensione të mëdha ndërmjet asamblistëve të PDK-së, LDK-së me asamblistët e Vetëvendosjes dhe kryetarin Ahmeti.
Hipotetikisht paradite asamblistët Stavileci dhe Krasniqi mund të përplasen me kryetarin Shpend Ahmeti, ndërsa pasdite të takohen në cilësinë e ministrave për të diskutuar për projekte të përbashkëta. Një fakt i tillë shpesh ka shkaktuar debate mbi objektivitetin e ministrave në raport me Komunën e Prishtinës.
Krerët e Komunës së Prishtinës në vazhdimësi kanë deklaruar se nuk kanë përkrahje nga Qeveria e Kosovës, por përkundrazi kanë pengesa të natyrave të ndryshme.
Ndërkohë, Qeveria e Kosovës deri më tani nuk ka bërë asgjë për Ligjin për Prishtinën, i cili do të rregullonte shumë gjëra në kryeqytet dhe kryetarit do t’i jepte më shumë kompetenca.
Kryeministri Isa mustafa, derisa ishte në krye të Prishtinës në vazhdimësi ka kërkuar Miratimin e Ligjit për Prishtinën. Ai këtë ligj e konsideronte të domosdoshëm për zhvillimin e qytetit të Prishtinës dhe përmirësimin e jetës së qytetarëve.
Në mungesë të këtij ligji, thoshte se ka pengesa të mëdha në punën e tij, ndërsa vazhdimisht akuzonte Hashim Thaçin (në atë kohë Kryeministër i Kosovës) se po e bllokonte këtë ligj qëllimisht për të penguar sukseset që mund të arrinte Komuna e Prishtinës në krye me Mustafën.
Edhe pse më shumë se kushdo Isa Mustafa e dinë rëndësinë e ligjit në fjalë, deri më tani ky ligj nuk është miratuar, ndërsa këtë punë në dorë e ka Isa Mustafa si kryeministër i vendit, pasi që mund ta shtyjë përpara këtë ligj, pasi që tani ka fuqi ta bëjë këtë.
Përplasje edhe me Ministrinë e Infrastrukturës
Ky mosbashkëpunim i institucioneve të nivelit qendror me atë të nivelit lokal në Prishtinë, si duket po bëhet për inate dhe kalkulime politike, ndërsa pasojat e kësaj i vuajnë qytetarët. Këto përplasje ndikuan që për një vit të mos aprovohej kërkesa e Komunës së Prishtinës për kredi për blerjen e autobusëve të ri. Kjo përudhë u karakterizua me akuza të ndërsjella ndërmjet Komunës së Prishtinës dhe Ministrisë së Financave, në krye të së cilës është Avdulla Hoti, i cili ishte nënkryetar i Komunës së Prishtinës para mandatit të Shpend Ahmetit. Megjithatë në javët e ardhshme pritet që një numër i autobusëve të ri të vijnë në Prishtinë.
Ministria e Infrastrukturës është ndër njëra nga institucionet që nuk ka pasur fare bashkëpunim me Komunën e Prishtinës.
Prej vitit 2013 asnjë projekt rrugor nuk është realizuar përmes bashkëfinancimit të Komunës së Prishtinës dhe Ministrisë së Infrastrukturës. Të dyja institucionet kanë fajësuar njëra-tjetrën për mungesë gatishmërie për bashkëpunim në këtë drejtim, duke hedhur akuza se kjo ka ndodhur për arsye politike.
“Ministria e infrastrukturës nuk përkrahu asnjë projekt të Komunës së Prishtinës”
Zëdhënësja e Komunës së Prishtinës Miranda Mullafazliu ka thënë për tesheshi.com se Ministria e Infrastrukturës nuk ka ofruar asnjë bashkëpunim konkret për të realizuar projekte infrastrukturore.
“Komuna e Prishtinës deri më tani nga Ministria nuk ka marre mbështetje për asnjë projekt të infrastrukturës rrugore. Arsyeja mund të jetë politike apo tjetër, mirëpo e vërteta është se nuk ka pasur bashkëpunim deri më tani”, thotë Mullafazliu.
Ajo thotë se Komuna e Prishtinës ka pasur shumë takime me zyrtarë të lartë të Ministrisë së Infrastrukturës, përfshirë vet ministrin dhe këshilltarët e tij dhe ka bërë kërkesa konkrete për financim të rrugëve nga kjo ministri.
“Kemi kërkuar ndërtimin e rrugës Stallovë- Zllashë- Viti e Marecit me gjatësi 10 kilometra, pastaj rrugën Rimanishtë-Siçevë, Rimanishtë-Sharban dhe për asnjërën nga këto nuk kemi marrë përgjigje. Në takimin e përbashkët me Kryetarin Ahmeti dhe Ministrin në fillim të këtij viti, jemi dakorduar në parim për disa projekte me bashkëfinancim. Ato janë zgjerimi i rrugës së Veternikut, një pjesë e unazës nga rruga për Fushë Kosovë që lidhet me autostradën, një rrugë prapa “Albi Mall” që lidhet me Veternikun, rrugën Hajkobillë-Zajçec-Tugjec, në gjatësi 12 kilometra, zgjerimin e rrugës Steskë-Mramor-Grashticë”, theksoi Mullafalziu.
Zëdhënësja Mullafazliu thotë se për projektet në fjalë, Ministria e Infrastrukturës ka premtuar se do t’i bashkëfinancoi, por deri më sot nuk është bërë asgjë në këtë drejtim nga kjo ministri.
“Ministri pati premtuar që punimet në Vetrnik do të fillojnë pranverën që kaloi. Të gjitha këto rrugë që u përmendën janë të projektuara nga Komuna e Prishtinës. Ne ende po presim për nënshkrimin e memorandumit të bashkëfinancimit, mirëpo deri tash asnjëra nga këto projekte as që ka filluar”, u shpreh Mullafazliu.
Për të njëjtën çështje me 2 nëntor të këtij viti, tesheshi.com ka dërguar pyetje edhe në zyrën për informim të Ministrisë së Infrastrukturës, por edhe pas pritjes për 8 ditë pune dhe ridërgimit të pyetjeve, nuk ka marrë përgjigje për këtë çështje. /tesheshi.com/
